O‘zbekiston bokschilari Jahon kubogida ishtirok etmaydi
Ostonadagi nufuzli musobaqada terma jamoamiz qatnashayotgani avval xabar qilingandi, biroq keyin qaror o‘zgardi
Rasm: Gazeta.uz
30 iyundan 7 iyulgacha Qozog‘istonning Ostona shahrida bo‘lib o‘tadigan Jahon kubogida O‘zbekiston erkaklar boks terma jamoasi ishtirok etmaydi. Bu haqda Qozog‘iston milliy jamoasi bosh murabbiyi Qayrat Satjanov ma’lum qildi.
“O‘zbekiston avval musobaqada qatnashish uchun ro‘yxat yuborgandi. Bir-ikki hafta o‘tgach esa, kelmasliklarini ma’lum qilishdi. Ostonada jahon chempionlari, Olimpiada g‘oliblari va Osiyo chempionlari ishtirok etadi. Musobaqa juda yuqori saviyada o‘tadi, deb umid qilaman”, — dedi Satjanov.
Avvalroq, sports24.uz nashri O‘zbekiston boks federatsiyasiga tayanib, terma jamoamiz musobaqada ishtirok etishi haqida xabar tarqatgan edi.
Bakradze Iman
Redaktor