Mirzaxalilovda chempionlik kamari, Аsadullaev va Mamasolievda navbatdagi gʼalabalar
Mirzaxalilovda chempionlik kamari, Аsadullaev va Mamasolievda navbatdagi gʼalabalar!
Rossiyaning Naberejne Chelni shahrida IBA.Pro 20 professional boks kechasi boʼlib oʼtdi. Unda xabar berganimizdek, 3 nafar vakilimiz ringga koʼtarilib, barchasi gʼalaba qozondi.
Birinchi ogʼir vazn — 90,7 kg toifasida Halimjon Mamasoliev (8-0, 7 KO) rossiyalik tajribali bokschi German Skobenko bilan 10 raundlik jang oʼtkazdi. Jang yakunida hakamlarning bir ovozdan bergan qaroriga koʼra, vakilimiz gʼalabaga erishdi.
55,3 kg vazn toifasida esa Mirazizbek Mirzaxalilov (5-0, 4 KO) IBF European chempionlik kamari uchun mezbonlar vakili Chingiz Natirov (10-0, 5 KO)ga qarshi ringga chiqdi. 4 raunddan soʼng rossiyalik bokschi jangni davom ettira olmadi va Mirzaxalilov texnik nokaut bilan gʼalaba qozonish barobarida chempionlik kamariga ham ega chiqdi!
Shuningdek, yarim oʼrta vazn — 66,7 kgda Havasbek Аsadullaev (8-0, 5 KO) rossiyalik Sergey Lubkovich (20-0-2, 12 KO)ga qarshi 10 raundlik bahsda ishtirok etib, muhim gʼalabani qoʼlga kiritdi.
Shu tariqa, uch nafar vakilimizning barchasi IBA.Pro 20 kechasini gʼalaba bilan yakunlab, professional ringdagi muvaffaqiyatli odimlarini davom ettirishdi.
