“Eyndhoven kubogi”: bokschilarimiz g‘alaba bilan ishtirokni boshlashdi
Niderlandiyaning Eyndhoven shahrida boks bo‘yicha nufuzli “Eyndhoven kubogi” musobaqasi boshlandi. Unda yurtimizning yetakchi charm qo‘lqop ustalari — Parij-2024 Olimpiadasi yo‘llanmasini qo‘lga kiritgan Abdumalik Halokov va Asadxuja Mo‘ydinxo‘jayev, shuningdek Olimpiada ishtirokchisi To‘rabek Habibullayev o‘z mahoratlarini namoyish etmoqda.
Quvonarli tomoni, barcha bokschilarimiz musobaqani ishonchli g‘alaba bilan boshladi:
• Abdumalik Halokov (-60 kg) niderlandiyalik Geronima Hartmansni hakamlar yakdil qarori bilan — 5:0 hisobida mag‘lub etdi.
• Asadxuja Mo‘ydinxo‘jayev (-70 kg) ukrainalik Evgeniy Ivanyuk ustidan ham 5:0 hisobida ishonchli g‘alabaga erishdi.
• To‘rabek Habibullayev (-90 kg) esa litvalik Jonas Jazeviciusni shu hisobda mag‘lub etib, birinchi bosqichni muvaffaqiyatli yakunladi.
Bokschilarimizga musobaqaning keyingi bosqichlarida ham omad tilab qolamiz.
