Boks. Aleksandr Usik Duboani beshinchi raundda nokautga uchratib, mutlaq jahon chempioniga aylandi
Londondagi “Uembli” stadionida Usik va Duboa o‘rtasida revanj jangi bo‘lib o‘tdi.
38 yoshli mag‘lubiyatsiz seriya qayd etib kelayotgan ukrainalik bokschi Aleksandr Usik 27 yoshli britaniyalik Daniyel Duboani beshinchi raundda nokaut evaziga mag‘lub etdi.
Shu tariqa Usik super og‘ir vazn toifasida boks bo‘yicha mutlaq jahon chempioniga aylandi.
Usik va Duboa o‘rtasidagi dastlabki jang 2023 yil 26 avgust kuni Polshaning Vrotslav shahrida bo‘lib o‘tgan edi. O‘shanda ukrainalik sportchi to‘qqizinchi raundda raqibini nokautga uchratgandi.
Eslatib o‘tamiz, Usik professional boksda 2013 yildan beri ishtirok etadi. Uning rekordida 24 ta g‘alaba mavjud bo‘lib, ulardan 15 tasini nokaut orqali qo‘lga kiritgan va birorta ham mag‘lubiyatga uchramagan. U avval birinchi og‘ir vazn toifasida ham mutlaq jahon chempioni bo‘lgan.
