Bassam Ganem O‘zbekistonga tashrif buyurdi
Xabaringiz bor, joriy yilning 1-16 may kunlari Toshkent shahri o‘smirlar va kichik o‘smirlar o‘rtasida bo‘lib o‘tuvchi Osiyo chempionatiga mezbonlik qiladi. Mazkur qit'a chempionatiga tayyorgarlik qay yo‘sinda kechayotganligi va shart-sharoitlar bilan yaqindan tanishish uchun kuni kecha, "Asian Boxing" tashkiloti Bosh menejeri Bassam Ganem yurtimizga tashrif buyurdi.
O‘zbekiston boks federatsiyasi Bosh kotibi Shohid Tillaboyev hamrohligida martabali mehmon butun kun mobaynida Osiyo chempionatiga tashrif buyuruvchilarning yashash sharoitlari uchun yaratilgan qulayliklar hamda ushbu chempionat o‘tkaziluvchi arenani ko‘zdan kechirdi.
Qolaversa, janob Bassam kichik o‘smirlar o‘rtasidagi O‘zbekiston chempionati final bahslarini ham bevosita arenadan kuzatib bordi.
Yakunda, Toshkent shahri nufuzli musobaqani yana bir marotaba yuqori saviyada o‘tkaza olishiga ishonch hosil qildi.
