Bakudagi g'alabadan to'rt kun o'tib, Saidjamshid Jafarov professional ringga chiqadi
18 aprel kuni Chelyabinsk shahrida professional boks bo'yicha IBA.Pro 2 turniri bo'lib o'tadi. Unda O'zbekiston sharafini himoya qiluvchi ikki bokschi ham ishtirok etadi.
Premier Boxing Academy jamoasi a'zosi Saidjamshid Jafarov professional ringdagi ikkinchi jangini o'tkazadi. U rossiyalik tajribali raqib - Sergey Lubkovichga qarshi jang qiladi. Jang 6 raunddan iborat bo'lib, 71 kggacha bo'lgan vazn toifasida o'tadi. Lubkovich hisobida 18 g'alaba (12 ta nokaut) va 1 mag'lubiyat mavjud.
17 aprel kuni rasmiy tarozidan o'tish marosimi bo'lib o'tdi. Har ikki bokschi vazn limitiga mos tushdi: Lubkovich - 70,6 kg, Jafarov - 70,75 kg.
Eslatib o'tamiz, Saidjamshid Jafarov ham atigi to'rt kun oldin Baku shahrida yakunlangan xalqaro «Buyuk Ipak Yo'li» turnirida chempionlikni qo'lga kiritgan edi. Ushbu musobaqada u Ozarbayjon terma jamoasi safida ishtirok etgan.
IBA.Pro 2 turnir doirasida yana bir o'zbekistonlik bokschi - Madiyar Saidraximov ham ringga chiqadi. U rossiyalik Andrey Stotskiyga qarshi 6 raundlik jang o'tkazadi. Madiyar raqibidan taxminan bir kilogramm og'irroq bo'ldi: 91,2 kgga qarshi 90,35 kg.
Turnirning markaziy jangida sobiq jahon chempioni Sergey Kovalyov ishtirok etadi. Yarim engil vazn toifasida jang qiladigan rossiyalik bokschi, bu jangga tayyorgarlikning asosiy qismini O'zbekistonda o'tkazdi. Uning raqibi - Germaniya vakili Artur Mann. Bu Kovalyov uchun professional kareradagi oxirgi jang bo'ladi.
