Bahodir Jalolovning Nyu-Yorkdagi jangi 10 raund etib belgilandi

Boks 16 iyn 2025 da 08:30

Bakradze Iman

Redaktor

Superog‘ir vazn toifasida harakat qilayotgan yurtdoshimiz Bahodir Jalolovning navbatdagi jangi 26 iyul kuni AQShning Nyu-York shahridagi mashhur “Madison Square Garden” arenasida bo‘lib o‘tadi. Mazkur kecha Top Rank promouterlik kompaniyasi tomonidan tashkil etiladi.

Avval xabar berganimizdek, Jalolov ushbu shou doirasida Italiya vakili, 36 yoshli Janmarko Kardiloga qarshi ringga chiqadi. Bokschimizning menejerlik kompaniyasi — “Mir Boksa” xabariga ko‘ra, jang 10 raund davom etadi.

Shu paytgacha Bahodir Jalolov professional ringda 15 marta jang o‘tkazgan va barchasini g‘alaba bilan yakunlagan. Barcha janglarda raqiblarini nokautga uchratgani uning kuchli zarbaga ega ekanini ko‘rsatadi.

Janmarko Kardilo esa o‘z faoliyati davomida 15 ta jang o‘tkazgan: 12 g‘alaba, 1 mag‘lubiyat va 2 durang natijasiga erishgan. Uning barcha janglari Italiyada bo‘lib o‘tgan.