Ahmadaliev: Chempionning uyiga borib, unvonni olib kelish kerak
Ikkinchi engil vazn toifasida WBA yo‘nalishi bo‘yicha vaqtinchalik chempion hisoblangan o‘zbekistonlik Murodjon Ahmadaliev 14 sentabr kuni Yaponiyaning Nagoya shahrida Naoya Inouega qarshi o‘tadigan tarixiy jang oldidan intervyu berdi.
“Professional faoliyatimga nazar tashlasangiz, faqat bir marta o‘z uyimda jang qilganman. Meksika, Nyu-York, Puerto-Riko, Xitoy va AQShda ko‘plab janglar o‘tkazganman. Men uchun qayerda jang qilish muhim emas — men doim safarga chiqib, g‘alaba qozonganman. Chinakam chempionlar aynan shunday yo‘l tutadi. Chempionning uyiga borib, kamarlari olib kelish kerak”, — dedi Ahmadaliev.
U, shuningdek, raqiblarni “yirtqich” deb atash tendentsiyasiga ham munosabat bildirdi: “Men o‘zimni hech qachon shunday deb aytmaganman va bu Inouega ham tegishli deb o‘ylayman. Biz, avvalo, insonmiz”.
Eslatib o‘tamiz, ushbu jangda Inouening WBA, WBC, IBF va WBO kamarlari xavf ostida bo‘ladi. G‘olib esa mutlaq chempion unvonini qo‘lga kiritadi.
