Unga butun faoliyati davomida ishonilmagan nemis Vardisi haqida
2022 yilgi Jahon chempionatida Germaniya terma jamoasi uchta o‘yinda 10,1 xGlik imkoniyat yaratdi, ammo atigi oltita gol urdi.
Samardorlikning pastligi Bundestimning guruh bosqichidayoq sharmandali tarzda musobaqani tark etishiga sabab bo‘ldi. Markaziy hujumchi muammosi jamoani uzoq vaqtdan beri ta’qib qilib kelmoqda — deyarli Miroslav Kloze davridan buyon.
Xansi Flik va Yulian Nagelsmann turli variantlarni sinab ko‘rishdi: "so‘zma-so‘z to‘qqizlik" rolini bajargan Tomas Myuller va Kay Haverts, shuningdek Burkardt, Füllkrug va Voltemade kabi hujumchilar. Ammo bularning barchasi muammoning vaqtinchalik yechimi edi, xolos.
2026 yilgi Jahon chempionatida Nagelsmann birdaniga to‘rt hujumchini olib keldi: Haverts, Voltemade, Bayer va Deniz Undav. Undav esa navbat oxirida edi — 29 yosh, "Shtutgart"da o‘ynaydi va Germaniyadan tashqarida uncha mashhur emas. Ha, u mavsum davomida 25 ta gol urdi va jamoasi bilan Bundesligada to‘rtinchi o‘rinni oldi. Ammo maqom jihatidan u raqiblaridan ortda edi.
Kyurasoga qarshi ilk tur o‘yinida Undav formal ravishda maydonga tushirildi — 64-daqiqa, hisob 4:1 edi. Biroq u imkoniyatdan mahkam ushladi: to‘rt daqiqadan keyin Braun'ga golli pas berdi, so‘ng o‘zi gol urdi va o‘yin oxirida Havertsga assist qildi. Bu ajoyib chiqishga qaramay, Kot-d’Ivuarga qarshi ikkinchi turda Nagelsmann uni yana zaxirada qoldirdi. Murabbiyni tushunish mumkin edi — charchagan Kyuraso himoyasiga qarshi o‘ynash boshqa, Afrikaning kuchli jamoalaridan biriga qarshi o‘ynash boshqa. Ammo Undav yana zaxiradan tushib, ajoyib samarani ko‘rsatdi: dubl qayd etib, Germaniyaga qiyin o‘yinda g‘alaba keltirdi va hozir Lionel Messi hamda Jonatan Devid bilan birga musobaqa to‘purarlari ro‘yxatida yetakchilik qilmoqda. Eng qizig‘i, u maydonda jami bir soatdan sal ko‘proq vaqt o‘tkazgan!
"U jarima maydonida juda aqlli o‘ynaydi", — dedi o‘yindan keyin Nagelsmann. — "Keyingi o‘yinda uni asosiy tarkibda tushirish masalasini muhokama qilamiz".
Aslida esa Undavga deyarli hech qachon ishonilmagan. Hattoki Nagelsmann uni JCh saralash o‘yinlariga ham chaqirmagan. U kambag‘al kurd-ezid oilasida tug‘ilgan va faoliyatini eng past ligada boshlagan. "Verder" akademiyasiga qabul qilingan, ammo tez orada iste’dodsiz deb topilib, jamoadan chetlatilgan.
Professional futbolga yo‘lni to‘rtinchi diviziondan boshlagan: "Ayntraxt" (Braunshveyg)da imkoniyatni jarohat tufayli qo‘ldan boy bergan, yana past ligaga qaytgan. Faqat 24 yoshida Belgiyaning ikkinchi divizionidagi "Union"ga o‘tdi — jamoani elitaga olib chiqdi va birinchi mavsumning o‘zida chempionlikka erishdi. O‘zi esa 27 gol bilan turnir to‘purari bo‘ldi. Bu hikoya Jeymi Vardining yo‘lini eslatmaydimi?
Sky Sports’ga bergan intervyusida Undav rivojlanishida rafiqasi Tanya muhim o‘rin tutganini aytgan. U uning hayot tarzini o‘zgartirgan: avval mashg‘ulotdan keyin dam olib, noto‘g‘ri ovqatlanardi, hozir esa rejimga amal qilib, Belgiyada besh kilogramm vazn tashlagan.
Keyin "Brayton"da omadsiz transfer va "Shtutgart"ga hal qiluvchi o‘tish yuz berdi. Bu yerda u Sebastian Xyoness qo‘l ostida yangi qirralarini ochdi. Jamoaning yuqori pressingga asoslangan tezkor futboldagi Undavga juda mos tushdi.
Germaniya Voltemade va Burkardtning o‘sishini kuzatayotgan paytda, Undav soyada qolib, o‘z imkoniyatini kutib yashadi. Endi esa u haqida jiddiy gapirila boshlandi. So‘nggi 8 o‘yinda 9 ta gol — bu juda kuchli natija. U Miroslav Klozedan keyin Jahon chempionatining ilk ikki o‘yinida gol urgan birinchi nemisga aylandi.
Bu esa uni JCh-2026ning eng katta kashfiyotlaridan biriga aylantirishi mumkin.
