Jahon chempionlaridan kim JCH-2026 ga kelmaydi?
Amaldagi jahon chempioni Argentina terma jamoasi JCH-2026 uchun yakuniy tarkibni eng oxirgilaridan biri sifatida e’lon qildi.
Lionel Scaloni o‘yinchilarni tanlashda shoshilmadi. Natijada, murabbiy turnirga maksimal mumkin bo‘lgan son – 26 nafar futbolchini olib ketmoqda:
darvozabonlar: Emiliano Martinez (“Aston Villa”), Juan Musso (“Atletico”), Jeronimo Rulli (“Marsel”);
himoyachilar: Nahuel Molina (“Atletico”), Gonzalo Montiel (“River Plate”), Cristian Romero (“Tottenhem”), Lisandro Martinez (“Manchester United”), Nicolas Otamendi (“Benfika”), Nicolas Tagliafico (“Lion”), Leonardo Balerdi, Facundo Medina (ikkalasi ham – “Marsel”);
yarim himoyachilar: Juliano Simeone, Tiago Almada (ikkalasi ham – “Atletico”), Leandro Paredes (“Boca Juniors”), Giovani Lo Celso (“Betis”), Rodrigo De Paul (“Inter Mayami”), Exequiel Palacios (“Bayer”), Nicolas Gonzalez (“Yuventus”), Nico Paz (“Como”), Alexis Mac Allister (“Liverpul”), Enso Fernandez (“Chelsi”), Valentin Barco (“Strasburg”);
hujumchilar: Xulian Alvares (“Atletico”), Lionel Messi (“Inter Mayami”), Lautaro Martinez (“Inter” Milan), Xose Manuel Lopes (“Palmeyras”).
JCH-2022 g‘oliblarining aksariyati bo‘lajak jahon chempionatida ham maydonga tushadi, jumladan, ishtiroki so‘roq ostida bo‘lishiga qaramay, Messi ham. Ammo – barchasi emas. Argentinaning “oltin” jamoasidan bugungi Scaloni jamoasi tarkibida to‘qqiz kishi yo‘q. Kimlar va nima sababdan yo‘qligini aytib beramiz.
· Franco Armani, darvozabon
· To‘rt yil avval Armani va Rulli JCH-2022 ga asosiy darvozabon Martinezning zaxira o‘yinchisi sifatida borishgandi. O‘sha paytda 36 yoshli “River Plate” darvozaboni barcha o‘yinlarni zaxirada o‘tkazgan bo‘lsa-da, jahon chempioni unvonini undan hech kim tortib ololmaydi. Endi Franco 39 yoshda – va u hanuz Buenos-Ayresning top-klubida. Biroq, 2026-yilgi mavsum Armani uchun mutlaqo omadsiz o‘tdi. Bu yil u atigi ikki o‘yin o‘tkazdi – fevral va may oylarida, qolgan vaqtini esa Axill payi jarohatidan tiklanish bilan o‘tkazmoqda. Tajribali darvozabon Argentina terma jamoasiga so‘nggi marta Amerika Kubogi – 2024 da borgan, shundan so‘ng u milliy terma jamoadagi faoliyatini yakunlashga qaror qilgan.
· Xuan Foyt, himoyachi
· JCH-2022 da “Vilyarreal”ning universal himoyachisi zaxirada edi. Foyt faqat Xorvatiya bilan yarim finalda – hisob 3:0 bo‘lib turganida, o‘yin tugashiga 10 daqiqa qolganda zaxiradan maydonga tushdi. Ehtimol, Xuan JCH-2026 da Argentina terma jamoasining asosiy futbolchisi bo‘lishga umid qilgandir, axir u endi tajribali 28 yoshli futbolchi. Bundan tashqari, u hali ham “Vilyarreal”da o‘ynamoqda va bu jamoa bilan Primeraning kuchli uchligidan joy olgan. Biroq, nasib etmadi. Jarohat Foytga chempionlik unvonini himoya qilishda ishtirok etishiga to‘sqinlik qildi: yanvar oyida argentinalik Axill payini yorib oldi va taxminan kuzgacha safdan chiqdi. Shu sababli, JCH-2026 oldidan uning familiyasi hattoki 55 kishilik kengaytirilgan ro‘yxatda ham yo‘q edi. Joriy mavsumda himoyachi 18 ta o‘yinda maydonga tushishga ulgurgan.
· German Pezzella, himoyachi
2022-yilda Pezzella “Betis” futbolchisi, Argentina terma jamoasida esa zaxira futbolchisi edi. Ammo shunga qaramay, u uchta o‘yinda maydonga tushdi. Scaloni himoyachini guruh bosqichida Polsha bilan, chorak finalda Niderlandiya bilan va finalda Fransiya bilan (116-daqiqada) zaxiradan maydonga tushirgan. Endi 34 yoshli German – “River Plate” futbolchisi. U vatani Argentina'ga ikki yil avval qaytgan. 2025-yil yozida u tizzasining xochsimon payini jarohatlab, faqat aprel oyida maydonga qaytdi. 2026-yilgi mavsumda u bor-yo‘g‘i sakkizta o‘yinda maydonga tushdi, yana yettitasida esa zaxirada qoldi. Scaloni Pezzellani jahon chempionatiga boradigan kengaytirilgan tarkibga kiritgan, biroq bunday holatda himoyachi jamoaga yordam bera olmas edi.
Markos Acuna, himoyachi
Acuna JCH-2022 da Argentina terma jamoasi uchun muhim shaxs edi. Himoya va yarim himoyaning chap qanotini yopadigan universal futbolchi guruh bosqichida Meksika va Polsha, 1/8 finalda Avstraliya va chorak finalda Niderlandiyaga qarshi o‘yinlarda asosiy tarkibda maydonga tushgan.
Yana ikki marta “Sevilya” vakili zaxiradan maydonga tushirilgan – 1-turda Saudiya Arabistoniga va finalda Fransiyaga qarshi (64-daqiqada). 2024-yilda Markos Argentinaga qaytdi va o‘shandan beri “River Plate”da o‘ynamoqda. 2026-yilgi mavsumda 34 yoshli himoyachi 17 ta o‘yinda bitta gol va bitta golli uzatma muallifi bo‘ldi. Acuna kengaytirilgan tarkibda ham bor edi, biroq jahon chempionatiga Scaloni uni olib ketmadi – shunchaki boshqalarni afzal ko‘rdi. Argentina OAV ma’lumotlariga ko‘ra, Markos murabbiyning qaroridan “hayratda va hafsalasi pir bo‘lgan”.
Alejandro Gomez, yarim himoyachi
To‘rt yil avval yoshi katta, deyarli 35 yoshli Gomez “Sevilya” tarkibida JCH-2022 ga tayyorlana oldi. U hatto turnirdagi birinchi o‘yinda Saudiya Arabistoniga qarshi asosiy tarkibdan joy oldi. Biroq sensatsion mag‘lubiyatdan (1:2) so‘ng Scaloni Papuni zaxiraga o‘tkazdi va faqat 1/8 finalda Avstraliyaga qarshi maydonga tushirdi. 2023-yil oktyabr oyida yarim himoyachi JCH-2022 oldidan olingan doping-testdan o‘ta olmagani uchun ikki yillik diskvalifikatsiya oldi. Argentinaning baxtiga, bu voqea tufayli turnir natijalari qayta ko‘rib chiqilmadi. Biroq Gomez faoliyatini yakunlamadi va 2025-yil noyabrida Italiya B seriyasining “Padova” klubi tarkibida maydonga qaytdi. Joriy mavsumda u to‘qqizta o‘yinda samarali harakatsiz va bir nechta to‘piq jarohatlari bilan qatnashdi. 38 yoshda, bunday sport formasi bilan terma jamoa haqida orzu qilmasa ham bo‘ladi.
Guido Rodriguez, yarim himoyachi
Rodriguez avvalgi jahon chempionatiga “Betis” futbolchisi sifatida borgan. Scaloni uni faqat bitta o‘yinda – guruh bosqichining 2-turida Meksikaga qarshi maydonga tushirdi. Qolaversa, asosiy tarkibda. Markaziy yarim himoyachi bir soatga yaqin o‘ynadi. Hozirda 32 yoshli Guido Ispaniyada “Valensiya” sharafini himoya qilmoqda, u yanvar oyida “Vest Hem”dan erkin agent sifatida ushbu jamoaga o‘tdi. U JCH-2026 ga borish imkoniyatini oshirish uchun klubini o‘zgartirdi. Agar Angliya jamoasida u odatda zaxirada qolgan bo‘lsa, Ispaniya jamoasida asosiy tarkib futbolchisiga aylandi. 17 ta o‘yinda to‘rtta gol urdi. Yaxshi sport formasiga kirib oldi, kengaytirilgan ro‘yxatga kiritildi. Ammo baribir yakuniy qaydnomaga kira olmadi.
Anxel Di Maria, yarim himoyachi
Di Maria – JCH-2022 da Argentinaning asosiy yulduzlaridan biri. “Yuventus” yarim himoyachisi butun guruh bosqichini asosiy tarkibda o‘tkazdi, biroq pley-off oldidan sog‘lig‘ida muammolar paydo bo‘ldi va finalgacha Anxel faqat chorak finalda Niderlandiyaga qarshi o‘yinda ishtirok etdi – qo‘shimcha vaqtda 10 daqiqaga maydonga tushdi. Lekin Fransiya bilan oltin uchun kurashda Di Maria bir soat davomida o‘ynadi, ustiga-ustak, argentinaliklarning ikkinchi goliga mualliflik qildi. Besh o‘yinda jami 1+1 natija qayd etdi. Jahon chempionatidagi g‘alabadan so‘ng yarim himoyachi Amerika Kubogi – 2024 gacha terma jamoada qoldi va bu turnirda ham g‘olib chiqqach, milliy jamoadan ketdi. Lekin 38 yoshida ham hali “changitmoqda”. 2026-yilgi mavsumda o‘zining “Rosario” jamoasi safida 20 ta o‘yin o‘tkazib, yettita gol urdi va to‘rtta golli uzatma berdi.
Anxel Correa, hujumchi
O‘sha Argentina terma jamoasidagi yana bir Anxel, lekin Di Maria kabi unchalik muhim shaxs emas. “Atletico” hujumchisi JCH-2022 da faqat bitta o‘yinda maydonga tushdi. Scaloni unga, xuddi Foytga o‘xshab, Xorvatiya bilan yarim finalda uchrashuv natijasi shubha tug‘dirmayotgan paytda so‘nggi 10 daqiqani o‘ynashga imkon berdi. 2025-yil yozida Correa Yevropani tark etdi va o‘sha kundan beri milliy terma jamoaga chaqirilmayapti. 31 yoshli argentinalik Meksikaning “Tigres” klubida o‘ynamoqda, aytgancha, bu jamoa yaqinda KONKAKAF Chempionlar ligasi finalida penaltilar seriyasida yutqazdi. Anxelning mavsumdagi natijasi – 50 ta o‘yinda 18 ta gol va 13 ta golli uzatma. Yaxshi statistika, ammo shunga qaramay Scaloni Correa'ni hattoki kengaytirilgan ro‘yxatga ham kiritmadi. Undan tashqari ham zo‘r hujumchilar yetarli.
Paulo Dybala, hujumchi
JCH-2026'ni o‘tkazib yuboradigan argentinaliklar ichida deyarli eng yulduzli ism! Garchi o‘tgan turnirda Dybala'ning oltin uchun hissasi katta bo‘lmagan bo‘lsa ham. Yarim finalgacha u o‘ynamadi, Xorvatiya va Fransiya bilan o‘yinlarda esa yakunda zaxiradan maydonga tushdi.
“Roma” forvardi samarali harakatlarni amalga oshirmadi, ammo finalda penaltilar seriyasida gol urdi. 32 yoshli Paulo hanuz Rim klubida va u bilan tugayotgan shartnomasini uzaytirishi kerak. Bu mavsumda u 27 ta o‘yinda 3 ta gol urib, 8 ta golli uzatma berdi. Jarohatlar sababli taxminan to‘rt oyni o‘tkazib yubordi. Scaloni uni hattoki kengaytirilgan tarkibga ham kiritmadi. Dybala'ning yo‘qligini izohlar ekan, murabbiy to‘rt yil davomida o‘z darajasini pasaytirmaganlar terma jamoaga chaqirilganini ta’kidladi.
