Теннис. Маргарита Хусанова Швейцариядаги нуфузли U14 турнирида финалга чиқди
Ўзбекистонлик ёш теннисчи Маргарита Хусанова Швейцариянинг Монтрё шаҳрида бўлиб ўтган Tennis Europe Junior Tour U14 турнирида ажойиб натижа қайд этди.
Ушбу мусобақа 14 ёшгача бўлган теннисчилар ўртасидаги нуфузли халқаро турнирлардан бири ҳисобланади. Унда Швейцария ҳамда Европанинг турли давлатларидан келган кучли ва истиқболли жуниор теннисчилар иштирок этишди. Бундай турнирлар ёш спортчилар учун катта тажриба мактаби бўлиб, келажакдаги халқаро фаолият учун муҳим босқич саналади.
Маргарита турнир давомида бир нечта кучли рақибаларни мағлуб этиб, финалгача етиб борди. Ҳал қилувчи учрашувда ҳамюртимиз Швейцария вакили Матильде Поззага қарши кортга чиқди. Қизиқарли ва муросасиз кечган финал баҳсида Маргарита 3:6, 6:0, 6:7(2) ҳисобида имкониятни бой берди.
Шунга қарамай, ушбу натижа Ўзбекистон теннисининг ёш авлоди учун катта муваффақиятдир. Маргаритани финалдаги иштироки билан табриклаймиз ва келгуси халқаро мусобақаларда омад тилаймиз!