Ўзбекистон Олимпиада-2028 учун тайёргарлик бўйича ислоҳот дастурини тасдиқлади
Тошкентда Президент Шавкат Мирзиёевга 2028 йили Лос-Анжелесда бўлиб ўтадиган Олимпия ўйинларига тайёргарлик доирасида спорт тайёргарлиги тизимини модернизация қилишга қаратилган дастур ҳамда миллий терма жамоанинг иштирок стратегияси тақдим этилди. Реформа асосий эътиборни ёш иқтидорларни аниқлаш, спорт таълими тизимини такомиллаштириш ва спортчилар ҳамда мураббийлар учун рағбатлантириш механизмларини яратишга қаратган.
Иқтидорли спортчиларни аниқлаш мақсадида бутун мамлакат бўйлаб «Янги Ўзбекистоннинг Олимпия чўққилари» деб номланган уч босқичли танлов ташкил этилади. Бу мусобақа туман, вилоят ва республика босқичларида ўтказилади. Финал босқичи — «Президент Олимпиадаси» — ҳар йили Олимпия шаҳарчасида бўлиб ўтади. Ғолиблар ва совриндорлар махсус тайёргарлик марказларига қабул қилинади ва етакчи мутахассислар қўл остида машғулотларни давом эттиради.
Спорт таълими тизимида ҳам жиддий ўзгаришлар кутилмоқда. Республика Олимпия ва Паралимпия маркази мактаб-коллеж тизими асосида қайта ташкил этилади. Бу янги формат 8–11-синф ўқувчилари ҳамда ОТМларнинг 1–2 курс талабалари учун спорт тайёргарлиги ва таълимни уйғунлаштириш имконини беради. Яъни, академик таълим ва профессионал спорт ўртасида узлуксиз боғланиш таъминланади.
