Шоҳасан Мирзаматов Octagon 72 мусобақасида Форзод Ғадерийга қарши реванш жанги ўтказади
11 май куни Тошкентдаги «Ҳумо Арена»да Octagon 72 аралаш жанговар санъатлар турнири бўлиб ўтади. Унда Ўзбекистоннинг машҳур жангчилари қаторида Шоҳасан Мирзаматов ҳам октагонга чиқади. Унинг рақиби — 39 ёшли Эрон вакили Форзод Ғадерий бўлади. Бу жангчилар ўртасидаги иккинчи тўқнашув бўлади: 2024 йил апрел ойидаги илк жангида Мирзаматов муддатидан олдин ғалаба қозонганди, аммо у пайтда катта қаршиликка дуч келган эди.
Жангчилар статистикаси:
Шоҳасан Мирзаматов (34 ёш): 18 жанг — 14 ғалаба, 4 мағлубият
Форзод Ғадерий (39 ёш): 33 жанг — 18 ғалаба, 15 мағлубият
Ташкилотчилар ушбу жанг катта қизиқиш уйғотиши ва томошабоп тарзда ўтишига ваъда беришмоқда. Octagon 72 турнири бу баҳор ўзбек ММА дунёсидаги энг йирик воқеалардан бирига айланиши кутилмоқда.
