Саломда эшкак эшиш. Ўзбекистон терма жамоаси Ал-Айн шаҳрида ўтаётган халқаро ўқув-машғулот йиғинида иштирок этмоқда
Саломда эшкак эшиш бўйича Ўзбекистон миллий терма жамоаси Бирлашган Араб Амирликларининг Ал-Айн шаҳрида ўтаётган халқаро ўқув-машғулот йиғинида иштирок этмоқда.
Йиғинга 16 нафар спортчи жалб этилган, шунингдек, 4 нафар мураббий ҳамда 2 нафар халқаро мутахассис Павел Смирнов, Хернанс Самуэль машғулотларда фаолият олиб бормоқда.
Мазкур ўқув-машғулот йиғинида терма жамоамиз вакиллари билан биргаликда Буюк Британия, Германия, Словакия, Словения, Хитой, Польша, Россия, Швейцария, Хорватия, Андорра, Франция ва Нидерландия жамоалари ҳам қатнашмоқда.
Йиғин 20-февралга қадар давом этади. Шундан сўнг слаломчиларимиз 2–8-март кунлари Таиландда бўлиб ўтадиган 23 ёшгача бўлган спортчилар ўртасидаги Осиё чемпионати ва ICF Ranking мусобақаларида иштирок этишади.
Экстрим слалом йўналишида эса ушбу баҳсларда юртимиз шарафини Самандар Сайдуллаев, Данияр Исломов ва Мустафо Матибоев ҳимоя қилади.
Таъкидлаш жоизки, миллий терма жамоа таркибидан жой олган етакчи спортчиларнинг спорт анжомлари янгиланган бўлиб, улар мусобақаларда янги қайиқларда иштирок этишади.
