Рузибоевнинг собиқ рақиби жангдан икки ҳафта ўтиб ҳибсга олинди
UFCнинг ўрта вазн тоифасидаги америкалик жангчиси Седрик Дюма катта можарога аралашиб қолди. 12 апрел куни Майамида бўлиб ўтган UFC 314 турнирида Михал Олексейчукка қарши жангда техник нокаут билан мағлуб бўлган спортчи ортидан икки ҳафта ўтиб Флорида штати полицияси томонидан қўлга олинди.
29 ёшли Дюмага бир қатор оғир айбловлар қўйилган — талончилик ва ҳужумдан тортиб, қурол сақлаш ва гиёҳванд моддалар истеъмолигача. У ҳозирча қамоқда сақланмоқда, суд белгилаган кафиллик пули миқдори 558 минг долларни ташкил қилмоқда.
Эслатиб ўтамиз, 2023 йилда Седрик Дюма ўзбекистонлик Нурсултон Рузибоевга қарши октагонга чиқиб, техник нокаут билан мағлуб бўлган эди. Бу воқеа унинг фаолиятидаги илк катта жиноий ҳолат сифатида қайд этилди, гарчи 2024 йил феврал ойида ҳам у полиция текширувига тортилиб улгурган бўлган.
