РАСМАН: Тошкент 2026 йилда дзюдо бўйича ёшлар ўртасидаги жаҳон чемпионатига мезбонлик қилади
Қозоғистондаги "Катта Дубулға" турнири доирасида Ўзбекистон пойтахтида ёшлар ўртасидаги жаҳон чемпионатини ўтказиш бўйича тарихий келишув имзоланди.
Ҳужжат Халқаро дзюдо федерацияси (IJF) президенти Мариус Визер ва Ўзбекистон дзюдо федерацияси раиси Азизжон Камилов томонидан имзоланди.
Турнирни Иорданиядан Ўзбекистонга кўчириш тўғрисидаги қарор мамлакатимизнинг юқори халқаро нуфузининг тасдиғи бўлди. Бундай нуфузли мусобақаларнинг Тошкентда ўтказилиши давлатимиз раҳбарининг шахсан спортни ривожлантиришга қаратган эътибори ва ёшларни қўллаб-қувватлаш борасидаги кенг кўламли ислоҳотларининг жаҳон ҳамжамияти томонидан эътироф этилиши ҳисобланади.
Азизжон Камилов бошчилигидаги Федерациянинг тизимли фаолияти ва 2022 йили катталар ўртасидаги Жаҳон чемпионатини муваффақиятли ўтказиш тажрибаси туфайли Халқаро дзюдо федерацияси (IJF) Ўзбекистонни хавфсизлик ва мукаммал ташкил этишни кафолатлайдиган энг ишончли ҳамкор сифатида танлади.
Жаҳон чемпионати 2026 йилнинг 19-22 ноябр кунлари бўлиб ўтади. Турнир Янги Ўзбекистоннинг спорт салоҳиятини намоиш этиш учун муҳим майдон ва спортчиларимиз келажакдаги Олимпия ғалабалари учун кучли рағбат бўлади.
