Расман: Макс Ферстаппен 24 соатлик пойгада иштирок этади
«Формула-1» бўйича тўрт карра жаҳон чемпиони Макс Ферстаппен 2026 йилда «24 соат Нюрбургринг» афсонавий пойгасида ўзининг шахсий «Verstappen Racing» жамоаси таркибида иштирок этишини расман тасдиқлади.
Пойгачи ушбу нуфузли марафон учун Mercedes-AMG GT3 автомобилни танлади. Ферстаппен билан биргаликда экипаж таркибига тажрибали пойгачилар — Лукас Ауэр, Жюль Гюнон ва Даниэл Хункаделя кирди. Жамоа «Mercedes-AMG Team Verstappen Racing» номи остида, Red Bull ҳомийлигида мусобақалашади.
- Тайёргарлик: Ферстаппен 21 март куни Нюрбургрингда бўлиб ўтадиган квалификация босқичида иштирок этади.
- Асосий марафон: «24 соат Нюрбургринг» мусобақаси 2026 йил 14—17 май кунлари бўлиб ўтади.
Шунингдек, манбаларга кўра, агар тақвимда ўзгаришлар юз берса (масалан, Саудия Арабистони Гран-приси бекор қилинса), Макс апрель ойи ўрталарида (18—19 апрель) Нюрбургрингдаги навбатдаги босқичда ҳам қатнашиши мумкин.
Ферстаппен ўз интервьюларида «Шимолий ҳалқа»да (Nordschleife) ғолиб бўлиш унинг орзуси эканлигини ва у ерда электромоторсиз, максимал тезликда пойга қилиш имкониятидан хурсандлигини таъкидлаган.
