Нодирбек Абдусатторов: “Менинг энг кучли рақибим - бу Магнус Карлсен”
Ўзбекистоннинг биринчи рақамли гроссмейстери Нодирбек Абдусатторов ўзи ҳақидаги қизиқарли 10 та саволга жавоб берди:
- Ўзингизни шахматчи сифатида қандай таърифлайсиз?
- Мен ўзимни агрессив ўйин усулига эга ўйинчи деб биламан. Ҳар бир партияда охиригача курашиш ва босим остида ҳам тўғри қарор қабул қилиш — менинг асосий кучли томонларим.
- Севимли дебютингиз қайси?
- Менинг энг севимли дебютим Руи Лопес (Испанча партия деб ҳам аталади).
- Нима учун айнан шу дебютни ёқтирасиз?
- У жуда кўп қиррали, тарихий меросга эга ва замонавий шахмат стратегиясида ҳам муҳим ўрин тутади. Кўплаб буюк чемпионлар шу дебютга таяниб келишган.
- Ўз ўйинларингизни яна қайси томондан кучайтиришни хоҳлайсиз?
- Ўйиннинг якунловчи қисми — эндшпилни ривожлантириш. Магнус Карлсен каби чуқур техникага эга бўлишни истайман.
- Сизни илҳомлантирган шахматчи ким?
- Мени энг кўп илҳомлантирган шахматчи — Гарри Каспаров. Унга ҳавас қиламан ва унинг ўйин услубидан ўрнак олишга ҳаракат қиламан.
- Энг кучли рақибингиз ким бўлган?
- Албатта, Магнус Карлсен. У барча даврларнинг энг кучли шахматчиларидан бири, ҳали ҳам юқори савияда ўйнамоқда.
- Онлайн ёки офлайн шахмат, сиз қайси бирини афзал кўрасиз?
- Мен офлайн шахматни афзал кўраман, чунки онлайн шароитда рақибнинг юз ифодалари, ҳиссиётлари кўринмайди. Жонли баҳсда эса рақибнинг реакцияларидан ҳам фойдаланиш мумкин.
- Ҳозиргача эришган энг катта ютуғингиз қайси?
- 2021-йилда жаҳон рапид чемпионлигига эришишим ва илк бор олтин медал олишим — ҳозиргача менинг энг катта ютуғим.
- Келажакдаги энг катта мақсадингиз нима?
- Болаликдан бери дунёда биринчи рақамли шахматчи бўлишни орзу қиламан. Бу ҳар қандай топ ўйинчининг энг олий мақсади.
- Бу мақсадга эришиш қийин бўлмайдими?
- Албатта, осон эмас. Олдинда жуда катта меҳнат ва синовлар кутиб турибди. Лекин мен бунга тайёрман ва олдинга интилишдан тўхтамайман.
Эслатиб ўтамиз, Нодирбек Абдусатторов ҳозирда Парижда бўлиб ўтаётган Freestyle Chess Grand Slam турнирида иштирок этмоқда. Ҳамюртимиз бугун Максим Вашье-Лаграв билан 5-ўрин учун иккинчи партиясини ўтказади. Кечаги ўйинда Абдусатторов рақибини мағлуб этганди.
