Михаел Шумахернинг Феррари жамоасига қўшган ҳиссаси Италия Гран-приси дам олиш кунлари давомида алоҳида эътироф этилди
Михаел Шумахернинг Феррари жамоасига қўшган ҳиссаси Италия Гран-приси дам олиш кунлари давомида алоҳида эътироф этилди.
Себастян Феттел ўзининг кумири ва дўсти Михаел Шумахер бошқарган Феррари Ф2002 болиди рулига ўтганини «жуда ҳаяжонли лаҳза» деб атади. Бу воқеа ўтган дам олиш кунлари Италия Гран-приси олдидан содир бўлди.
Бу йил Шумахер Сcудериа Феррари сафига қўшилганига 30 йил тўлади. Немис пойгачиси 1996-йилги Италия Гран-присида ғалаба қозонди ва Феррари билан 11 йиллик даврни бошлаб берди. Шу вақт давомида у беш марта пилотлар чемпионлигини ва жамоа билан олти марта Конструкторлар кубогини қўлга киритди.
Болалигидан Шумахерни ўз кумири деб билган Феттел кейинчалик Формула-1даги фаолияти давомида етти карра жаҳон чемпиони билан яқин дўстга айланди. У Монзада Шумахернинг Ф2002 болидини бошқариш учун ташриф буюрди.
Ушбу автомобил Шумахерга 2002-йилда Феррари сафидаги учинчи чемпионлик унвонини қўлга киритишда ёрдам берган. Ўша мавсумда немис пойгачиси барча 17 та пойгада шоҳсупага кўтарилган — бу натижа ҳозиргача такрорланмаган.
«Аввало, бу дўстим учун, уни ва ўша даврни ёдга олиш учун. Бу жуда ҳаяжонли лаҳза бўлди. У болалигимдаги қаҳрамоним эди, кейинчалик эса дўстлигимиз жуда мустаҳкамланди. Биз жуда яқин бўлиб, кўплаб ажойиб хотираларни бирга баҳам кўрдик.
Менимча, бу шунчаки бир-икки давра босиб ўтишдан анча кўпроқ нарсани англатади. Бу унинг машинаси, шу билан бирга чемпионликни қўлга киритишга қодир бўлган болид. Бу — Феррари. Монзада, «Тифоси» мухлислари қаршисида».
— деди Феттел Ф2002 рулига ўтириш олдидан олган таассуротлари ҳақида сўралганда.
