Гран-пригача 420 км — Велосипедда
Пойгадан сўнг пилотлар одатда аэропортга шошилишади. Аммо 37 ёшли Формула-1 пилоти Валттери Боттас велосипедга ўтириб, Малайзиядан Сингапурга навбатдаги Гран-при сари йўл олди.
Самолётда учиш ўрнига — асфальт ва шағалли йўллар бўйлаб қарийб 420 километр масофа. Боттас автомобиллар ёнидан велосипедда ўтиб кетаётганида, йўлдаги машиналарнинг видеорегистраторларига ҳам тушиб улгурган.
Cadillac пилоти пайшанба кунигача манзилга етиб бориб, пойга ҳафталиги олдидан ўтказиладиган тадбирларда қатнашишни режалаштирмоқда. Велоспорт Боттаснинг азалий севимли машғулотларидан бири бўлиб, у мунтазам шуғулланади ва велопойгаларда иштирок этади.
Формула-1 пилотлари — ҳар томонлама тайёрланган спортчилардир. Уларнинг жисмоний тайёргарлиги куч, чидамлилик, мувофиқлаштириш ва тезкор реакцияни ўз ичига олади. Пойга автомобили рулида улар юқори юкламалар ва иссиқ ҳароратга бардош бериб, бутун пойга давомида диққатни жамлашлари ҳамда ҳаракатлар аниқлигини сақлашлари керак.
Боттаснинг велосипеддаги сафари ана шундай тайёргарликнинг ёрқин намунасидир. Автоспорт мукаммал жисмоний тайёргарликни талаб қилади: автомобилни бошқариш маҳорати организмнинг узоқ давом этадиган юкламаларга бардош бериш қобилияти билан уйғун бўлиши зарур.
