Фарғонада ҳакамлар учун ўқув-машғулот йиғини давом этмоқда
Суперлигага номзод бўлган, Про лигада фаолият олиб бораётган бош ва ёрдамчи ҳакамлар Фарғона вилоятида ташкил этилган ўқув-машғулот йиғини доирасида амалий ва назарий машғулотларни давом эттирмоқда.
Йиғин жараёнида ҳакамлар “Ҳоким кубоги” мусобақаси учрашувларини бошқариб, реал ўйин шароитида ўз маҳоратини синовдан ўтказмоқда. Майдондаги ҳар бир вазият бўйича тўғри позиция танлаш, интизомий чораларни қўллаш ва ўйинни назорат қилиш масалаларига алоҳида эътибор қаратилмоқда.
Шунингдек, VAR хонасида ўйин эпизодлари замонавий технологиялар ёрдамида таҳлил қилиниб, мутахассислар томонидан батафсил тушунтириш ва амалий тавсиялар берилмоқда. Баҳсли вазиятлар атрофлича муҳокама қилиниб, ягона қарор қабул қилиш мезонлари устида ишланмоқда.
Йиғин давомида ҳакамларнинг жисмоний тайёргарлиги ҳам мустаҳкамланмоқда. Майдондаги ҳаракатланиш ва тезкор қарор қабул қилиш кўникмаларини ошириш асосий вазифалардан бири бўлиб қолмоқда.
