Дзюдо. Япониядаги йиғиннинг иккинчи босқичи: Tokai University базаси
Ўзбекистон эркаклар терма жамоаси Японияда ўқув-машғулот йиғинини давом эттирмоқда. Иккинчи босқич дунёдаги энг кучли дзюдо мактабларидан бири бўлган афсонавий Tokai University базасида бўлиб ўтмоқда.
Бу ерда ҳар бир машғулот мукаммаллик сари қадам: ёшин тезлиги, кимонони ушлаш учун кескин кураш, шиддатли беллашувлар, тезликда партерга ўтиш. Tokai University – бу чемпионлар маскани бўлиб, у ерда исталган сонияда жанг натижасини ҳал қила оладиган ва энг қийин вазиятларда иппонга эриша оладиган спортчилар тайёрланади.
Бош мураббий Алексей Будолин қўл остида терма жамоамиз "Tashkent Grand Slam" турнирига мақсадли тайёргарлик кўрмоқда. Жамоа ажойиб ритмда, жанговор кайфиятда ва тўлиқ фидойилик билан ишламоқда, яқин келажакдаги халқаро стартларга ишонч билан тайёрланмоқда.
