Байдарка ва каноэда эшкак эшиш. Спортчиларнинг натижалари
Ўзбекистон кубогининг биринчи куни шиддатли беллашувларга бой бўлди. Об-ҳаво шароитига қарамай, ҳар бир пойгада қатнашган спортчилар энг яхши натижаларини қайд этишга ҳаракат қилдилар. Ҳаммани ларзага солган 200 метр масофадаги пойга бу Андижон мактаби тарбияланувчиси Нилуфар Зокирова, сирдарёлик Шоҳсанам Шерзодова, Тошкент вилоятидан Хонзода Эркиновалар иштирокидаги беллашув бўлди. Каноэчиларимизнинг барчаси биринчи бўлишга интиладилар. Олтин Нилуфарга насиб этди.
Байдаркачи қизларимиз орасида Екатерина Шубина биринчи, унинг ортидан Арина Танатмишева иккинчи ва кучли учликка эса Екатерина Шубинанинг шогирди ва икки йиллик танаффусдан сўнг катта спортга қайтган Дарья Мишина якун ясади. Албатта, спортчиларимиз нафақат бир масофада балки 200м, 500м, 1000м масофаларда ҳам ўз маҳоратларини синовдан ўтказишди.
Владлен Денисовнинг ғалабасидан илҳомланган Артур Гулиев ҳақиқий қирол бўлиб, биринчиликни яна қўлга олди. Артурга май ойида Хитойда бўлиб ўтадиган Осиё чемпионатида ва Португалиядаги жаҳон кубоги босқичида ҳам биринчи бўлиш насиб этишини тилаб қоламиз. Демак, Артурдан кейин Элёржон Мамадалиев 2-ўринни эгаллаган бўлса, 3-ўринни Камолиддин Раҳматуллаев қўлга киртди.
Байдаркачи эркаклар ўртасида фарғоналик Даврон Салимов 2023-йилги Самарқанддаги Осиё чемпионатида совриндорлар қаторидан жой эгаллаган бўлса, бу сафар у икки самарқандлик рақибини ортда қолдириб, шоҳсупанинг энг юқори поғонасига кўтарилди. Эслатиб отамиз, унинг ортидан келган Озоджон Амриддинов ўтган йили микст йўналишида Осиё чемпиони бўлган. Шаҳбозжон Абдуллоев 3-ўринни банд этди.