Жаҳон Лигалари ассотсиацияси делегацияси ЎФА раҳбарияти билан учрашди
Жаҳон лигалари ассотсиацияси бош котиби Жером Перлемутер, ташкилот мутахассиси Станислав Штипков, Чехия футбол лигаси ижрочи директори Томаш Барта ҳамда ЎзПФЛ бош директори Диёр Имомжўқаев Ўзбекистон футбол ассотсиациясига ташкилот биринчи вице-президенти Равшан Эрматов билан учрашув учун келди.
ЎФА ҳамда ЎзПФЛ ўртасидаги алоқалар учрашувнинг асосий мавзуси бўлди. Сир эмаски, Ассотсиация ҳамда Лига ўтган 5 йил давомида катта ҳажмдаги ишни бажарди ва бу албатта терма жамоалар натижасида ҳам акс этди.
Сир эмаски, 2020-йилдан бошлаб ЎзПФЛ U19 чемпионатини йўлга қўйди. Бугунга келиб Суперлига ва Пролиганинг барча клублари мазкур чемпионатда ўз жамоаси билан иштирок этмоқда. Ўрта ҳисобда 800 га яқин 15 ёшдан 19 ёшгача бўлган иқтидорли футболчиларни қамраб олган мусобақа ёшлар футболининг янги даражага чиқишига замин яратди. Хусусан, 2018-йил Ўзбекистон U17 терма жамоаси Осиё чемпионатининг саралаш босқичини муваффақиятсиз якунлаган бўлса, 2023-йилда жамоамиз мусобақанинг ярим финалигача етиб борди, 2025-йилда эса чемпионликни қўлга киритди.
U21 чемпионатининг ислоҳ қилиниши эса Ўзбекистон U20 терма жамоаси учун селекция жараёнини осонлаштирди. 2023-йилда жамоамиз қитъа кубогининг соҳибига айланди. JLA делегацияси бу йўлда босиб ўтилган қадамлар билан таништирилди. ЎФА томонидан тайёргарлик босқичида амалга оширилган ишлар кўрсатилди. Сир эмаски, бугунга келиб Ўзбекистоннинг ёшлар терма жамоалари ўндан зиёд хорижий йиғинларда иштирок этади ҳамда UEFA, CONMEBOL каби конфедерацияларнинг кучли терма жамоаларига қарши кураш олиб боради.
Шунингдек, Олимпик лойиҳаси, унинг Пролига ва Суперлигадаги иштироклари, якунда Ўзбекистон ўз тарихида илк бор Олимпиада йўлланмасини қўлга киритгани, Суперлиганинг сўнгги йилларда жонланиши, миллий терма жамоамиз Жаҳон чемпионати йўлланмасига қай тарзда эга чиққанлиги тушунтириб ўтилди.
Йиғилиш якунида JLA делегацияси самимий учрашув учун ЎФА раҳбариятига миннатдорчилик билдирди.