Ўзбекистон футбол ассотсиацияси томонидан ташкил этилган Ҳақамлар академиясининг 2026 йилги мавсумига расман старт берилди
Ўзбекистон футбол ҳақамлиги тизимини янги босқичга олиб чиқиш, ёш ҳақамларнинг назарий билимлари ва амалий тажрибасини ошириш мақсадида Ўзбекистон футбол ассотсиацияси томонидан ташкил этилган Ҳақамлар академиясининг 2026 йилги мавсумига расман старт берилди.
Бугун Миллий футбол марказида ЎФА раҳбарияти, тажрибали инструкторлар ҳамда истиқболли ёш ҳақамлар иштирокида академиянинг янги мавсуми очилишига бағишланган учрашув бўлиб ўтди. Унда иштирокчиларга академиянинг асосий вазифалари, ўқув дастурлари ҳамда ёш ҳақамлар учун яратилган имкониятлар ҳақида батафсил маълумот берилди.
ЎФА биринчи вице-президенти Равшан Ирматов ўз нутқида ушбу лойиҳа нафақат юртимизда, балки минтақада ҳам футбол ҳақамлигининг ривожида муҳим ўрин тутишини таъкидлаб ўтди. Шунингдек, академия орқали ҳақамлик тизимини халқаро стандартларга мослаштириш, ёш мутахассисларни юқори даражага олиб чиқиш асосий мақсад эканини қайд этди.
Янги мавсум доирасида академия нафақат ўқув маркази, балки ёш ҳақамлар учун тажриба алмашиш, таҳлил қилиш ва доимий ривожланиш майдони вазифасини ҳам бажаради.
Маълумот учун, академиядаги таълим жараёни 8 та модулдан иборат бўлиб, саралаб олинган 25 нафар ҳақам 8–11 апрел кунлари Миллий футбол марказида назарий ва амалий ўқув курсининг 1-модулида иштирок этади.
Ёш ҳақамлар кейинги модуллар давомида Республика миқёсидаги ёшлар ўртасидаги ўйинларда малака оширишади.
