Ёрқин Назаров: 3 очко олиш осон бўлмаяпти
Про-лиганинг 5-туридан ўрин олган "Республика ФА" – "Каттақўрғон" (0:1) ўйинидан сўнг меҳмонлар бош мураббийи Ёрқин Назаров матбуот анжуманида иштирок этди.
– Ўйиндан кейинги фикрларингиз билан ўртоқлашсангиз.
– Ўйинга келадиган бўлсак, ўзиңиз гувоҳ бўлдингиз, мураккаб баҳс бўлди. Уч очкони қўлга киритиш осон кечмаяпти. Яқиндагина ўқув-машғулот йиғинида бу жамоани қийналмасдан мағлуб этаётган эдик. Футболчилар ўша-ўша, аммо кўриб турганингиздек, расмий ўйинда қанчалик мураккаб бўлди. Фурсатдан фойдаланиб, барча мухлисларимизни ва "Каттақўрғон" жамоасини ғалаба билан табриклайман.
– Жамоада ҳозир бир муаммо кўзга ташланмоқда: олдинги ўйинларда, айниқса, биринчи бўлимда жамоа кўнгилдагидек ҳаракат қила олмаяпти. Бугун ҳам рақиб босим ўтказган пайтда футболчилар чуқур ҳимояга ўтиб олишди. Бу ниманинг ҳисоби? Сабаби жисмоний ҳолатгами?
– Жуда ўринли савол бердингиз. Бу ҳолат ўзимизни ҳам ўйлантирмоқда, ҳар куни ўйинларни таҳлил қиляпмиз. Мана, бешинчи тур ўтди. Биринчи бўлимда таркибни турлича шакллантириб кўряпмиз, бироқ негадир ўйинимиз қовушмаяпти. Иккинчи бўлимда эса майдонга тушиб, гол ураяпмиз ва ғалаба қозоняпмиз. Бунинг сабаби рақиб босимидан чарчаб қолиш ёки жисмоний пасайиш эмас. Нима учундир айнан биринчи бўлимда ўйинимиз чиқмаяпти. Бунинг сабабларини ўрганяпмиз: таркибда ўзгаришлар қилиб кўрдик, турли усулларни қўлладик. Иккинчи бўлимда эса йигитлар қайта тизилиб, ўзимиз истаган ўйинни намойиш этмоқдалар. Вазиятлар яратяпмиз ва голлар ураяпмиз.
– Ўтган учрашувга нисбатан жорий ўйинда бошланғич таркибда сезиларли ўзгаришлар кўзга ташланди. Бу янги футболчиларни синаб кўриш мақсадида амалга оширилди ёки тактик ўзгаришларми?
– Бу юқоридаги саволингизга узвий боғлиқ. Биринчи бўлимдаги хатоликлардан сўнг, эҳтимол, бошланғич таркибни нотўғри танлаяпмизми, деган фикр билан бошқа футболчиларни майдонга тушириб кўряпмиз. Бу фақат сўнгги ўйинда эмас, балки аввалги учрашувлардан бери кузатилаётган ҳолат. Шукрки, бизда заҳира ўриндиғи кенг. Шунинг учун кимнингдир ўйини қовушмаса ёки тактикани ўзгартирмоқчи бўлсак, заҳирадаги бошқа ўйинчиларни майдонга тушириб синаб кўряпмиз.
