Слот жамоани тарк этаётган Салоҳ ҳақида гапирди
«Ливерпуль» бош мураббийи Арне Слот ҳужумчи Муҳаммад Салоҳ ҳақида ўзининг энг эсда қоладиган хотиралари билан ўртоқлашди.
Унинг айтишича, Салоҳ ҳақидаги асосий хотира айнан ўтган мавсум билан боғлиқ бўлади:
«Мен уни қандай эслайман? 100 фоиз — ўтган мавсум бўйича. Ўйлайманки, у ўзи ҳам айтган — ва бу мен айтгандан ҳам муҳимроқ, чунки у бу клуб билан барча совринларни ютиб бўлган — унинг фаолиятидаги энг муҳим соврин ўтган мавсумдаги Премьер-лига ғалабаси бўлган.
Энди эса мен ҳам ростини айтишим мумкин: бу менинг ҳаётимдаги энг муҳим ғалаба бўлди. Мен айнан шуни эслайман — ва ўша мавсумда у жамоа учун қанчалик муҳим бўлганини. Демак, мен учун ҳам — унинг барча голлари билан бирга.
Бу мавсумда жамоа аввалги даражада ўйнай олмади, аммо мен уни биринчи навбатда айнан ўтган мавсумдаги ўйини билан эслайман. Мухлислар эса, эҳтимол, уни клубда ўтказган барча йиллари учун қадрлашлари керак. Аммо мен учун у ҳақдаги энг асосий хотира доим ўтган мавсум бўлиб қолади», — деди мураббий.
Маълумот учун, Салоҳ жорий мавсум якунида «Ливерпуль»ни тарк этади. У жамоа сафида яна бир сўнгги ўйинда — 24 май куни «Брентфорд»га қарши баҳсда майдонга тушади.
