Шерзод Жўраев: Навбахор – бу бренд. Бизнинг Пахтакор, Насаф каби клублардан кам жойимиз йўқ
Суперлига 29-туридан ўрин олган "Машъал" – "Навбахор" (0:0) учрашувидан сўнг "Навбахор" бош мураббийи Шерзод Жўраев матбуот анжуманида иштирок этди.
- Ўйин ҳақида фикрингиз?
- Баҳс ҳақида гапирадиган бўлсак, "Машъал" жамоасининг охирги иккита ўйинини ўрганиб чиққан ҳолда тайёргарлик кўргандик. Муборакликлар уйда "Қўқон-1912"дан устун келишди ва Қашқадарё дербисида "Насаф"ни мағлуб этишди. Иккита учрашувдаги ғалабадан кейин руҳий томонлама устунлик "Машъал" томонида эди. Бугун бизга баъзи футболчиларимизнинг жароҳат олгани ўз таъсирини кўрсатди. Шу боис кўпроқ Комил Тожиддинов, Шерзод Ғуломжонов каби ёшларга имконият бердик. Ротация устида иш олиб бормоқдамиз. Бугун жамоамиз охиригача ҳаракат қилди, бунинг учун йигитларга раҳмат. "Машъал" жамоасига эса кейинги ўйинларда омад тилайман.
- "Навбахор" бош мураббийлигига энди келганингизда Суперлига тажрибаси биroz етишмаяпти деб айтган эдингиз. Бугун шу ҳам таъсир қилдими?
- Мен бу ҳолатни анчадан бери ичимда сақлаб келдим. Нимага десангиз жамоани қабул қилиб олганимда вазият жуда аянчли эди. Биз саккккизта ўйиндан бери ижобий натижа кўрсата олмай келаётгандик. Футболчиларнинг ўзига бўлган ишончи йўқолиб қолганди. Футболчиларга вазият салбий таъсир қилмаслиги учун ҳамма юкни ўзига олишимга тўғри келди. Чунки "Навбахор" мен учун жуда азиз клуб, менга кўп нарса берган.
- Агар раҳбарият сизга ишонишда давом этса, келаси йил нималарни ўзгартирган бўлардингиз?
- Яхши савол бердингиз. Ҳозир қўл остидаги мавжуд таркиб билан ишлашга тўғри келяпти. Мавсум якунланганидан кейин раҳбарият қарори қандай бўлишини билмайман. Менга ишонч билдирадиган асосий жамоа топширилгани катта шараф. Чунки "Навбахор" – бу бренд. Бизнинг "Пахтакор", "Насаф" каби клублардан кам жойимиз йўқ. Мен ҳар доим бор маҳсулотдан унумли фойдаланишга ҳаракат қиламан. Ротация эса албатта керак. Ёшларга ишонаман. Футболга нисбатан ўз қарашларим бор ва шуни сингдиришга ҳаракат қиляпман.
- Биламизки, сиз ҳужумкор футболни маъқул кўрасиз. Лекин бугунги ўйинда футболчилар орқага кўп бор тўп узатишди.
- Тўғри таъкидладингиз, тўп билан олдинга ҳаракат қилиш менга ёқади. Машғулотларда ҳам шунга кўп ишлаймиз. Бугун ҳимоя марказидаги икки асосий футболчимиз йўқлиги сабаб бошқаларни синаб кўрдик. Шу боис дарвозабон орқали ўйнашга мажбур бўлдик. Бундан ташқари, "Машъал" ҳам юқори прессинга ўтиб бизни шунга мажбурлади.
