Шайх Салмон Марказий Осиё футбол раҳбарлари билан учрашди
Осиё Футбол Конфедерацияси президенти Шайх Салмон бин Иброҳим Ал Халифа Марказий Осиё минтақасининг Ўзбекистон, Қирғиз Республикаси, Тожикистон футбол раҳбарияти билан учрашиб, яқин йиллардаги ҳамкорлик режалари ва минтақада футболни ривожлантиришнинг кейинги қадамлари юзасидан ўзаро фикр алмашди. Учрашувда ЎФА биринчи вице-президенти Равшан Ирматов ҳам иштирок этди.
ОФК президенти Шайх Салмон Марказий Осиё футбол ассоциацияси аъзолари сўнгги йилларда сезиларли ютуқларга эришганини таъкидлади.
Ўзбекистон 2022-йилда U-23 Осиё кубоги, 2023-йилда U-20 Осиё кубоги ва 2024-йилда футзал бўйича FIFA Жаҳон чемпионати юқори даражада ташкил этилганини эътироф этиб, Ўзбекистон йирик турнирларни ўтказишга қодир эканини яна бир бор исботлади, деди Шайх Салмон.
Шунингдек, ОФК президенти Ўзбекистон миллий терма жамоасининг 2026-йилги Жаҳон чемпионати саралаш босқичидаги муваффақиятли иштирокини ва мундиал йўлланмасини қўлга киритишга яқин турганини айтиб, жамоамизга омад тилади. Бундан ташқари, Марказий Осиё мамлакатлари футбол федерациялари томонидан кўрсатилаётган ташаббус ҳамда ҳаракатлар, минтақадаги ёшлар ва аёллар футболини ривожлантириш лойиҳаларини ижобий баҳолади.
ОФК раҳбари минтақадаги футболни янада юқори босқичга олиб чиқиш учун келгусида янги ташаббусларни амалга ошириш, ҳамкорликни кучайтириш ва ўзаро тажриба алмашиш зарурлигини таъкидлади. У, шунингдек, футболнинг ўсиши учун биргаликда ишлаш, янги ғоялар ва лойиҳаларни ҳаётга татбиқ этишнинг аҳамиятини қайд этди. Минтақадаги барча футбол ассоциациялари ўзаро ҳамкорликда келажакдаги янги натижа ва имкониятларга эга бўлишига ишонч билдирди.
Ўз навбатида ЎФА биринчи вице-президенти мамлакатимиз мезбонлик қилган халқаро турнирлар биз учун катта тажриба бўлгани, Марказий Осиё мамлакатлари келажакда бундан-да йирик футбол турнирларини ўтказишни мақсад қилгани, бу эса юртимиздаги футбол мухлислари учун ҳақиқий байрам бўлишини таъкидлади.
Марказий Осиёда футбол йилдан-йилга ривожланиб бормоқда. Сўнгги Осиё кубогида минтақанинг тўрт жамоаси (Ўзбекистон, Эрон, Тожикистон ва Қирғиз Республикаси) плей-офф босқичига йўл олгани бунинг исботи, дейишимиз мумкин. Келгусида минтақамизда Осиё кубогини ўтказиш, энг асосий мақсадларимиздан биридир, деди Равшан Ирматов.
