Сергей Токов: «Андижон» бундай таркиб ва мураббийлар билан бемалол совринли ўринлар учун кураша олади»
«Андижон» - «Хоразм» (1:0) ўйиндан кейинги матбуот анжуманида меҳмонлар бош мураббийи Сергей Токов иштирок этди.
- Ўйиндан кейинги фикрим шуки, учрашув оғир ва курашларга бой бўлди. Битта хатолик ўйин тақдирини ҳал қилди. Ким хато қилса, ўша мағлуб бўлади. Афсуски, хатога биз йўл қўйдик. «Андижон»ни ғалаба билан табриклайман.
- «Хоразм» жамоаси биринчи бўлимдан бошлаб беш нафар ҳимоячи билан ўйнади. Бу «Андижон»нинг ўйинига мослашиш мақсадида қилинган қарор эдими? Иккинчи бўлимда эса битта ҳимоячини камайтириб, тўрт ҳимоячи билан ўйнаб, ярим ҳимояга яна бир футболчини қўшиш мумкин эмасмиди?
- Менимча, биринчи бўлимни ёмон ўтказмадик. Беш нафар ҳимоячи билан ўйнашимиз ҳимояланишга қаратилган тактика эмас эди. Агар эътибор берган бўлсангиз, олдинда прессинг қилиш учун тўрт нафар футболчини қолдирган эдик. Шунинг учун иккинчи бўлимда... балки бироз чуқурроқ ўйнаб қолдик. Эҳтимол, бунга чарчоқ ҳам сабаб бўлгандир. Сунъий майдондан табиий чимли майдонга мослашиш ҳам бироз қийин кечди. Қайсидир маънода, ўйинда жисмоний жиҳатдан бизга янгилик, яъни куч етмаганди. Бундан ташқари, жароҳат олган футболчиларимиз ҳам бор. Шу сабабли ҳозирча ўйинни кучайтириш бироз қийин бўлмоқда. Лекин бизнинг мақсадимиз ҳимояда ўйнаш эмас эди. Аксинча, юқорироқ ўйнашга, прессинг қилишга ҳаракат қилдик. Иккинчи бўлимда эса бироз кучимиз камайиб қолди.
- «Хоразм» жамоаси кучли жамоаларга қарши яхши ўйин кўрсатяпти. Лекин ўртамийона жамоаларга қарши ўйнаганда қандайдир сустлик сезилаётгандек...
- Буни нимагa асосланиб айтяпсиз? Қайси жамоаларни ўртамийона деб ҳисоблайсиз? «Андижон»ни ўртамийона жамоа деб ҳисоблайсизми? Агар мана шундай таркибга эга жамоани ўртамийона деб ҳисобласангиз, унда нима дейишни ҳам билмайман. Демак, биз умуман бошқа даражада эканмиз. Рақиб жамоа таркибида шундай футболчилар борки, легионерлари ҳам яхши. Шахсан мен «Андижон»ни ўртамийона жамоа деб ҳисобламайман. Сизларда яхши мураббий ҳам, яхши жамоа ҳам бор. Менимча, бундай футболчилар таркиби ва шу мураббий билан жамоа бемалол совринли ўринлар учун кураша олади. Тўғри, қайсидир ўйинларда нимадир ўхшамаяпган бўлиши мумкин. Мен клубнинг ички ишларини билмайман. Аммо жамоа яхши шаклланган. Захирадан ҳам яхши футболчилар майдонга тушмоқда. Булар юқори даражадаги жамоаларда ўйнаган ва етарлича яхши ўйинлар кўрсатган футболчилар.
- Захирадан майдонга тушган футболчилар ўйинни қанчалик кучайтира олдилар?
- Ростини айтсам, улардан ўйинни кўпроқ жонлантиришини кутгандим. Аммо у кутилган натижани бера олмади. Балки ёш футболчи бироз ҳайжонланиб, ўзини йўқотиб қўйгандир. Ўйинни кучайтиришини хоҳлагандик, аммо, афсуски, бунинг уддасидан чиқа олмади.
- Стошич нима учун захирада қолдириляпти?
- Биз бошқа дарвозабонни ҳам таркибимизга қўшдик ва у Стошич билан рақобатда устун келди. Бугунги кунда мураббийлар штаби фикрига кўра, у кучлироқ. Шу сабабли ҳозир айнан — Умид Эргашев — ўйнамоқда.
