Россия терма жамоаси футболчиси Ўзбекистоннинг ЖЧга чиққани ҳақида кутилмаган фикр билдирди
Россия терма жамоаси ва Москванинг “Динамо” клуби ярим ҳимоячиси Данил Глебов ўзбек футболи учун муҳим воқелик ҳақида фикр билдирди. Унинг “Ростов”даги собиқ жамоадоши Элдор Шомуродов Ўзбекистон терма жамоаси билан тарихда илк бор 2026 йили бўлиб ўтадиган жаҳон чемпионатига йўлланма олди. Глебов бу ютуқ унда чин дилдан қизиқиш ва ҳурмат уйғотганини яширмади.
Журналистлар билан суҳбатда Глебов Шомуродов ва бутун Ўзбекистон терма жамоаси учун хурсанд эканини айтди. Унинг таъкидлашича, ЖЧга чиқиш мамлакат учун улкан воқеа ҳисобланади. Глебов ўзбек футболчилари муносиб ўйин кўрсатганини таъкидлаб, бу муваффақият тўлиқ қўлга киритилганини билдирди. Шунингдек, у тез орада Шомуродов билан боғланиб, шахсан табриклашини ҳам айтди. Улар ҳанузгача алоқада бўлиб туришади ва Глебов “Ростов”даги биргаликдаги фаолият даврида шаклланган дўстликни қадрлайди.
Глебов, шунингдек, Ўзбекистон терма жамоаси ўйинларини кузатиб бораётганини ва саралаш босқичидаги ҳаракатларидан таассуротланганини билдирди. Унинг фикрича, жамоа ўз ўйинини ишонч билан намоён қилмоқда, Шомуродов эса етакчилардан бири сифатида катта ҳисса қўшмоқда. Россиялик футболчи Ўзбекистон футболи юқори босқичга чиқиб бораётганидан мамнун эканини таъкидлади.
