Роналду минтақадаги вазият кескинлашгани сабабли Саудия Арабистонини тарк этди
«Ан Наср» клуби ҳужумчиси Криштиану Роналду минтақадаги вазият кескинлашгани сабабли оиласи билан бирга хусусий самолётда Саудия Арабистонини тарк этди. Бу ҳақда The Sun нашри хабар бермоқда.
Манбага кўра, португалиялик футболчининг самолёти «Flightradar» хизмати томонидан қайд этилган ва Мадридга қўнган.
Роналду Ар-Риёд шаҳрида рафиқаси Жоржина Родригес ва беш нафар фарзанди билан истиқомат қилади. Ўтган ҳафтанинг охирида шаҳар дронлар ҳужумига учради, бу эса Яқин Шарқдаги геосиёсий вазиятнинг кескинлашуви билан боғлиқдир.
Қайд этилишича, ҳужумлар давом этаётгани Роналдунинг мамлакатни тарк этиш қарорига таъсир қилган бўлиши мумкин.
Маълумот учун, 41 ёшли ҳужумчи жорий мавсум «Ан Наср» сафида 26 та ўйинда майдонга тушиб, 22 та голга муаллифлик қилди. Унинг Transfermarkt'даги нархи 12 миллион евро га баҳоланмоқда.
