Неманя Чаласан: «Мен тез-тез қизил карточка оладиган ўйинчилар сирасига кирмайман»
Неманя Чаласан: «Мен тез-тез қизил карточка оладиган ўйинчилар сирасига кирмайман»
«Андижон»нинг ўз майдонида «Пахтакор»га қарши ўтган учрашуви шиддатли ва кескин курашлар остида ўтди, фақат гол етишмади. Қолаверса, қизил карточкалар билан ҳам ёдда қоладиган бўлди. Мезбонлардан иккита, меҳмонлардан бир нафар ўйинчи майдондан четлатилди.
Учрашувдаги дастлабки қизил карточка «Андижон»нинг сербиялик ҳимоячиси Неманя Чаласанга кўрсатилди.
Футболчи эса «Пахтакор»га қарши ўйин, қизил карточка ва стадиондаги муҳит ҳақида интервью берди.
- Неманя, ўйин сизда қандай таассурот қолдирди?
- Ўйлайманки, агар биз майдонда 11 га 11 бўлиб қолганимизда, ғалаба қозонишимиз мумкин эди. Менда шундай ички туйғу бор эди. Қолаверса, ишқибозларимиз бизга фақат олдинга ундали ва уларнинг далдаси, кўмагида албатта гол урар эдик.
- Ўйин чоғида уч марта қизил карточка кўрсатилди, шулардан бири сизга. Ўша ҳолатни қандай изоҳлаб берган бўлардингиз?
- Мен олган қизил карточкага келсак, тўпни майдон марказидаги Черага узатмоқчи бўлдим. Лекин рақиб менинг бу режамни олдиндан ўқиди ва тўпни эгаллаб олди. Қўлимдан келадиган ягона иш – қоидани бузишдан иборат эди. Бу менинг хатойим ва жамоага панд бериб қўйганимни яхши тушуниб турибман. Мартинга келсак, у қизил карточкага муносиб иш қилмаганди.
- Майдонда юз берган воқеалардан келиб чиқиб, хулоса қилсак, 0:0 натижаси ўйинга мос келадими?
- Ростини айтсам, ўйин охирида деярли тенгма-тенг таркиб билан тўп сурганимизда бемалол беллашувни ютган бўлардик. Боя айтганимдек, мухлисларимиз бизга ғалаба қозонишимизга ёрдам беришарди. Камчилик бўлиб ўйнаб, 0:0 ҳисобигаги дурангга келсак, буни ёмон натижа деб ҳисоблаб бўлмайди. Натижадан кўнглим тўлди.
- Олган қизил карточкангиз фаолиятингиздаги нечанчиси?
- Мен тез-тез қизил карточка оладиган ўйинчилар сирасига кирмайман. Ўйлайманки, агар хотирам панд бермаётган бўлса, бу фаолиятимдаги учинчи қизил карточкадир.
- Стадиондаги муҳит сизга ёқдими?
- Стадиондаги муҳит ҳар доим ҳам қўйилмақом даражада. Бу борада ишқибозларимизга тенг келадигани йўқ. Уларнинг бизга кўрсатаётган беқиёс даражадаги қўллаб-қувватлашлари учун катта раҳмат айтаман.
- Биринчи давра ниҳоясига етди. Жамоанинг иштирокини қандай баҳолайсиз?
- Футболда ҳар доим ўсиш ва ривожланиш учун жой қолади. Мавсумнинг иккинчи қисмда хатоларимизни тўғрилашимизга ва янада кучлироқ ўйин намойиш қилишга ҳаракат қиламиз.
- Қизил карточка олган пайтингизда ишқибозлар сизга қарсаклар билан кузатиб қўйишди. Шундан сўнг кийимхонага йўл олдингиз. Жамоани озчилик бўлиб қолдирганингиздан ва гол ўтказиб юбориш эҳтимоли борлигини ўйлаб, бундан қай даражада қайғурдингиз?
- Яширмайман, мен жуда ҳам бундан қайғурдим. Албатта, мухлисларнинг мени майдондан олқишлар билан кузатиб қўйишгани юрагимни тўлқинлантириб юбoрди. Уларга бунинг учун катта раҳмат айтмоқчиман. Табиийки, жамоага панд бериб қўяётган экансан, албатта бундан изтиробга тушасан. Ишқилиб, дуранг натижани ушлаб қолайлик, ютқазиб қўймасак бўлди, деган фикр хаёлимдан кетмади.
- Қизил карточка олганингиздан сўнг Боаке ҳам орқангиздан кийимхонага қизил карточка олган ҳолда йўл олди. Уни кийимхонада кўрганингиздан ҳайрон бўлгандирсиз?
- Мартиннинг ҳам кийимхонага тушганини кўриб, тўғриси, ҳайрон бўлдим. Аммо бу футбол ва ушбу ўйинда исталган воқеа юз бериши мумкин. Майдонда доим катта босим ҳукмронлик қилади. Баъзи-баъзида эҳтирослар устунлик қилиб, қоида бузганингни ҳам билмай қолар экансан.
