«Металлург» клубига ФИФА томонидан қўйилган трансфер тақиқи олиб ташланди
Ўзбекистонда айни пайтда фаолият юритаётган клублар орасида ФИФА тақиқи мавжуд бўлганлар қолмади.
Фото: UzPFL
Кеча, 9-феврал санада, ФИФА Интизом қўмитаси Металлург клуби ва унинг собиқ футболчиси Иван Йосович ўртасидаги иш якунланганлиги ҳақида маълум қилди.
Бекобод клуби сербиялик футболчи олдидаги қарздорликларини тўлақонли бартараф этган ва Йосович клубга нисбатан қўлланган тақиқнинг олиб ташланишини сўраб мурожаат қилган. Шуни инобатга олган ҳолда, ФИФА Интизом қўмитаси клубга қўйилган янги футболчиларни рўйхатдан ўтказиш тақиқини олиб ташлаб, мазкур ишни ёпиқ деб эълон қилди.
Таъкидлаш жоизки, Ўзбекистонда айни пайтда фаолият юритаётган клублар орасида ФИФА тақиқи мавжуд бўлганлар қолмади.
Розикжон Султонмуродов
Журналист