Манчестер Сити ҳимоячиси Абдуқодир Ҳусанов ватанпарварлик руҳида яратилган янги бутсаларини намойиш этди
Англия клуби ўзининг расмий саҳифаларида ўзбек футболчисининг ўзига хос спорт пойабзали акс этган видеони эълон қилди. Бу гал Ҳусанов мухлисларни нафақат майдондаги ўйини, балки экипировкасини безашга бўлган янгича ёндашуви билан ҳам ҳайратда қолдирди - унинг бутсаларида Ўзбекистон байроғи тасвирланган.
Дизайн жуда аниқ ва мукаммал ишланган бўлиб, футболчининг ўз ватанига бўлган муҳаббатини ёрқин намоён этади. Ижтимоий тармоқ фойдаланувчилари бу ҳаракатни ижобий қарши олиб, Ҳусановнинг она юртига бўлган ҳурмати ва ижодий ташаббусини юқори баҳоладилар.
21 ёшли Ҳусанов «Манчестер Сити» ҳамда Ўзбекистон миллий терма жамоаси марказий ҳимоячиси ҳисобланади. Transfermarkt портали маълумотларига кўра, унинг трансфер баҳоси 35 миллион еврони ташкил қилади.
