Каталониянинг Барселона клуби вице-президенти франциялик футболчи Килиан Мбаппенинг дисквалификация муддатига муносабат билдирди
«Барселона» клуби вице-президенти Рафа Юсте Мадриднинг «Реал» клуби ҳужумчиси Килиан Мбаппенинг жазоси борасида интервю берди. Яқинда бўлиб ўтган Испания чемпионати учрашувида «Алавес»га қарши ўйиннинг 38-дақиқасида Мбаппе тўп учун курашда жуда қўпол ҳаракатга йўл қўйди - у шиплари билан Антонио Бланконинг оёғига зарба берди. Кейинроқ франциялик футболчи узр сўради, ва жабрланувчи бу узрни қабул қилди.
Mundo Deportivo нашри Юстенинг сўзларини келтиради: «Бу зарба ҳам, берилган дисквалификация ҳам мутлақо жиннилик. Бу жуда хавфли эди ва рақиб футболчининг жароҳат олишига сабаб бўлиши мумкин эди. Бу - шармандалик».
Мбаппени уч ўйинга дисквалификация қилишлари мумкин эди, шулардан бири «Барселона»га қарши учрашув бўлган. Аммо натижада у фақат навбатдаги турни ўтказиб юборади.
