Ислом Ахмедов: «Ҳаммага тенг ўйин амалиёти бермоқчимиз»
“Андижон” – “Крумкачи” (3:2) ўртасидаги ўртоқлик ўйинидан кейин жамоамиз бош мураббийи Ислом Ахмедов ўз фикрлари билан ўртоқлашди.
- Ислом Ғуломович, “Андижон” Минск йиғинидаги илк ўртоқлик ўйинини ўтказди. Таассуротларингиз қандай?
- Узоқ танаффусдан кейинги биринчи ўртоқлик ўйинимиз. Барибир шу нарса ўйин кечишига таъсир қилди. Ўйин натижаси қониқарли, аммо ҳали ишлайдиган камчиликларимиз кўп. Рақиб биз ўйлагандан кўра яхшироқ жамоа экан. Очиғи, бундай ўйин кўрсатишларини кутмагандик. Бизни яхши рақобатда синаб кўришди. Қандай камчиликлар устида ишлашимиз кераклигини кўрсатиб беришди.
- Иккала бўлимда икки хил таркибни кўздан кечирдингиз. Футболчиларнинг ҳаракатлари хусусида нималар дея оласиз?
- Биринчи бўлимда 0:0 кузатилди ва йигитларда мувозанат, ҳаммаси жойида эди. Ҳисобни очганимиздан кейин бу ҳол бизга биоз бўшашишга сабаб бўлди. Шу ҳисобга голлар ўтказиб юбордик. Йигитлар биоз мувозанатни йўқотиб қўйишди. Албатта, иккинчи бўлимдаги футболчилар ҳам астойдил ҳаракат қилишди. Уларга 30 дақиқа ўйнашгани ҳисобига ўз имкониятларидан фойдаланишга вақт етмади. Бугун 30 дақиқа учун майдонга тушганлар эртага 60 дақиқа ўйнашади. Бизни тайёргарлик йиғинимизда барчаси режалаштирилган. Ҳаммага тенг ўйин амалиёти бермоқчимиз, барчани бир хил формада ушлаб туриш учун.
- Йиғиндан ҳар томонлама қониқиб боряпсизми?
- Ишлашда давом этяпмиз. Тайёргарлик жараёнида яна 10 кун вақтимиз бор. Шу вақт давомида тайёргарлигимиз қандай кетаётганини кузатиб борамиз. Ҳозирги камчиликларимиз устида ишлаб, охирги ўйинлардан кейин қай даражада кўнглимиз тўлди ёки тўлмаганини айтишимиз мумкин», - дея Ахмедовнинг сўзларидан келтиради «Андижон» матбуот хизмати.
