Йоахим Лёв Ўзбекистонда иш бошласа, унга Марказий Осиёдан ёрдамчи тайинланиши мумкин
Футбол доирасига яқин манбалар хабарига кўра, Тожикистон терма жамоасининг собиқ мураббийи, хорватиялик мутахассис Петар Сегрт 2014 йилги жаҳон чемпиони Йоахим Лёв билан дастлабки музокараларни ўтказган. Суҳбат давомида агар Лёв Ўзбекистон терма жамоасига бош мураббий сифатида тайинланса, у ҳолда Сегрт ёрдамчи сифатида унинг штабини тўлдириши мумкинлиги муҳокама қилинган.
Қитъадаги энг йирик мусобақа - Осиё Кубогида Тожикистонни чорак финалга олиб чиққан 59 ёшли Сегрт шу пайтгача янги иш жойи топгани йўқ. Унга тушаётган таклифлар - жумладан, Тожикистондан келаётганлари - мутахассиснинг касбий ва молиявий интилишларига жавоб бермаяпти. У янги босқичга олиб чиқадиган ва амбицияларига мос келадиган лойиҳани изламоқда.
Манбаларга кўра, Сегрт жамоа ички муҳити, футболчилар ва маҳаллий жамоатчилик билан самарали алоқани таъминлаш орқали Лёвнинг фаолиятини енгиллаштириши мумкин. Унинг маҳаллий шароитга мослашган тажрибаси ва тил билими немис мутахассисининг тактик вазифаларга тўлиқ эътибор қаратишига ёрдам беради.
Бундай тандем - етакчи мутахассиснинг стратегияси ва ассистентнинг мулоқотдаги фаоллиги жамоа самарадорлигини оширишга хизмат қилиши мумкин.
