Қимматбаҳо мураббийга эҳтиёж йўқ: Кападзе ЖЧга бош мураббий сифатида бориши мумкин
Ўзбекистон терма жамоаси жаҳон чемпионатига тайёргарликни яқин кунларда бошлаши кутилмоқда. Кузда жамоа бир қатор кучли рақибларга қарши ўртоқлик ўйинлари ўтказишни режалаштирмоқда.
Ҳозирча миллий жамоага вақтинчалик равишда Тимур Кападзе раҳбарлик қилмоқда. Жамоа қайд этган муваффақиятларга қарамай, футбол ассоциацияси ҳали Кападзе номзодини расман мустаҳкамлагани йўқ. Бу ҳолат ОАВда турли тахмин ва мунозараларга сабаб бўлмоқда.
Айрим манбаларга кўра, жамоани таниқли мураббий бошқариши мумкинлиги айтилган. Улар орасида Германия терма жамоасининг собиқ устози Йоахим Лёв номи ҳам тилга олинган. Бироқ бу вариантнинг амалга ошиши эҳтимоли паст — Ўзбекистон футбол раҳбарлари жаҳон чемпионларини тайёрлаган мутахассисга юксак маош тўлашни истамаяпти. Маълумотларга кўра, Лёв Германия термасида йилига 3,8 миллион евро маош олган.
Бундан ташқари, Лёвнинг ўзбек футболчилари билан умумий тил топишига ишонч ҳам кам. Чунки жамоа футболчилари аввалги мураббий Сречко Катанец ва унинг ёрдамчилари ҳамда Кападзе билан ишлашга ўрганган.
