Хамробеков учун Эронда кураш кучаймоқда
Ўзбекистон терма жамоасининг етакчи футболчиларидан бири Одил Ҳамробеков учун халқаро трансфер бозорида рақобат кучайди. Тегераннинг «Эстеглял» жамоасига қўшимча равишда Тебриз шаҳрининг «Трактор» клуби ҳам уни ўз таркибига қўшишга қизиқиш билдирмоқда.
Эрон ОАВ хабарига кўра, «Трактор» клуби фаол ҳаракатга ўтди ва Ҳамробеков ҳозир тўп сураётган Тошкентнинг «Бунёдкор» жамоасига расмий сўровномани юборди. Бу ҳужжатда 29 ёшли таянч ярим ҳимоячини сотиб олиш шартлари муҳокама қилиниши сўралган.
Бундай қадам тебризликлар томонидан футболчига бўлган жиддий қизиқишдан далолат беради. Янгиланган мавсум олдидан ўз таркибини мустаҳкамлашни истаган клуб, Ҳамробеков учун курашга қўшилди.
Шу билан икки йирик жамоа — «Эстеглял» ва «Трактор» ўртасида ўзбек футболчиси учун тўғридан-тўғри рақобат юзага келмоқда.
