Фахрий футболчи ва инспектор Анатолий Коваленко 80 ёшни қарши олди
Бугун ўзбек футболи фахрийси, кўп йиллик ҳакамлик ва инспекторлик фаолияти билан ўзбек футболи тараққиётига катта ҳисса қўшган Анатолий Михайлович Коваленко 80 ёшга тўлди.
Анатолий Коваленко 1945-йил 6-декабрда Тошкент шаҳрида туғилган. Коваленко ёшлигидан "Меҳнат захиралари" жамоасида футбол билан шуғулланган. 1968–1970-йилларда “Старт” (Тошкент), 1974–1975-йилларда эса “Динамо” (Тошкент) жамоаларида тўп сурган.
Футболчилик фаолияти билан бир қаторда, у 1975-йилдан бошлаб Тошкент шаҳар биринчилиги учрашувларида ҳакамлик қила бошлаган. 1977-йилдан бошлаб Республика биринчиликларида, 1980–1989-йилларда эса Собиқ Иттифоқ 2-лигасида бош ҳакам сифатида фаолият олиб борган.
Анатолий Михайлович 1985-йилдан бошлаб Республика ўқув-йиғинларини ташкил этиш ҳамда ёш ҳакамларни тайёрлаш билан шуғулланган.
1990-йилдан Анатолий Коваленко инспектор сифатида ишлай бошлаган ва 1991-йилда Собиқ Иттифоқ 2-лигаси ўйинларида ҳам инспекторлик қилган.
Анатолий Михайлович ўзининг сермаҳсул фаолиятини 2014-йилда якунлаган.
Бугун Ўзбекистон футбол ассоциациясида Анатолий Коваленко шарафига юбилей тадбири ташкил этилди. Унда ЎФА раҳбарияти, фахрий футболчилар ва ҳакамлар сўзга чиқиб Анатолий Коваленко фаолиятини эсга олишди ва унинг фидойилиги, садоқатини юксак эътироф этдилар.
Тадбир якунида Анатолий Коваленкога миннатдорчилик рамзи сифатида эсдалик совғалари топширилди.
