Эржан Токотаев: «Ўзимни анча яхши ҳис қиляпман»
CAFA мусобақасининг 3-турида Ўзбекистон ва Қирғизистон миллий жамоалари ўртасидаги учрашувда “Андижон” дарвозабони Эржан Токотаев ўйиннинг иккинчи бўлим бошларида бошидан жароҳат олгани bois мажбурий ўзгариш сабабли майдонни тарк этганди.
«Андижон» матбуот хизмати Эржан билан боғланди.
- Эржан, соғлигингиз яхшими? Ўзбекистонга қарши ўйинда жароҳат олдингиз. Ҳозир ҳолатингиз қандай?
- Катта раҳмат. Ҳозирги пайтда ўзимни анча яхши ҳис қиляпман. Таҳлил натижаларидан сўнг шифокорлар ўзимни зўриқтирмаслигимни ва танамга дам беришим кераклигини тавсия қилишди. Шиш қайтиши учун бироз вақт керак. Шундан сўнг машғулотларга қайтишим мумкин.
- Умуман, миллий жамоамизга қарши учрашув сизда қандай таассурот қолдирди?
- Ўзбекистон билан ўйин ҳақида айтадиган бўлсам, ёмон бошламагандик. Айтишим мумкинки, рақиб биринчи таймда фақатгина битта голли вазиятни ҳисобга олмасак, деярли хавфли вазиятларни юзага келтира олмади. Иккинчи бўлимда эса деярли ўйнамадим. Иккинчи бўлимнинг дастлабки дақиқаларида тўқнашув юз берди ва ўйинни тарк этишимга тўғри келди.
- Маълумки, Туркманистон терма жамоасининг асосини «Аркадаг» клуби футболчилари ташкил қиладилар. Сиз эса Қирғизистон термаси сафида уларга қарши ўйнагансиз. «Андижон» ОЧЛ 2 нинг илк турини Ашхободда айнан «Аркадаг»га қарши ўтказишини яхши биласиз. Хўш, туркман футболчилари ҳақида нималарни айта оласиз?
- Тажрибали, малакали футболчилари бор. Албатта, қандай ўйин кўрсатишимиз ўзимизга боғлиқ. Лекин енгил ўйинлар бўлмайди.
- Айтинг-чи, «Аркадаг» билан учрашувда нимага кўпроқ эътибор қаратишимиз лозим? Масалан, уларнинг кучли ва кучсиз томонлари нимада деб ўйлайсиз?
- Менинг фикримча, биз нисбатан ёшроқ жамоамиз. Ўйлайманки, яхши темпда ўйин кўрсатадиган бўлсак, бу яхши натижа ҳам олиб келади.
- Андижонга қачон келасиз? CAFA мусобақасидан кейин ўзингизни қандай ҳис қиляпсиз?
- Ҳозирги пайтда тинчгина ва юкламаларсиз дам олишим лозим. Тезроқ сафга қўшилишим учун қўлимдан келган барча ҳаракатни қиляпман.
