Эляким Мангала “Сент-Этьен” мураббийлар штабига қўшилади
“Манчестер Сити” ва Франция терма жамоаси собиқ ҳимоячиси Эляким Мангала мураббийлик фаолиятида янги босқични бошламоқда.
Маълумотларга кўра, Мангала Франциянинг “Сент-Этьен” клуби мураббийлар штабига қўшилади. У жамоа бош мураббийи Ян Катрога ёрдамчи сифатида фаолият олиб боради.
Эляким Мангала футболчилик фаолияти давомида “Порту”, “Манчестер Сити”, “Валенсия”, “Эвертон” ва “Сент-Этьен” каби клублар шарафини ҳимоя қилган. У “Манчестер Сити” сафида Англия чемпионига айланган, “Порту” билан эса Португалия чемпионати ва Суперкубокда ғолиб бўлган.
Мангала учун “Сент-Этьен”га қайтиш алоҳида аҳамиятга эга. Сабаби, у аввал ушбу клубда футболчи сифатида тўп сурган бўлса, эндиликда мураббийлар штаби аъзоси сифатида жамоага ёрдам беради.
Аввалроқ Мангала мураббийлик фаолиятига қизиқишида Пеп Гвардиоланинг таъсири катта бўлганини таъкидлаган эди. Энди эса у футболчилик даврида орттирган тажрибасини мураббийлик фаолиятида қўллаш имкониятига эга бўлади.
Ҳозирда “Сент-Этьен” Франциянинг Лига 2 чемпионатида иштирок этмоқда. Клуб олдида юқори дивизионга қайтиш вазифаси турибди.
