Дониёр Абдуманнопов: «Суперкубокда ғалаба учун охиригача курашамиз»
“Андижон” Суперлиганинг 11-турида ўз майдонида “Сурхон”ни қабул қилди ва иродали тарзда 2:1 ҳисоби билан рақибидан устун келди.
Ушбу учрашувда Дониёр Абдуманнопов жамоасининг иккинчи голига муаллифлик қилди ва у ажойиб тарзда рақиб дарвозасини ишғол қилди.
Олдимизда эса “Андижон”ни 27 май куни Ўзбекистон Суперкубоги доирасида “Насаф”га қарши жуда муҳим ўйин кутмоқда.
Жамоанинг етакчиларидан бири Дониёр Абдуманнопов клуб матбуот хизматига бир қатор саволларга жавоб берди.
- “Андижон” “Сурхон”га қарши учрашувда мухлисларини қувонтира олди. Ушбу баҳс ҳақида фикрингиз қандай?
- Қийин ўйин ўтказдик. “Сурхон” яхши жамоа ва яхши ҳаракат қилди. Учрашувда анча қийналдик. Биринчи таймда бир қатор эпизодларда бой бердик. Голдан кейин бироз руҳий тушкунлик бўлди. Биринчи таймдан сўнг танаффус чоғида мураббийдан керакли кўрсатмаларни олдик, ўйин ўзгарди. Худога шукр, қийин вазиятдан чиқиб кетдик ва ғалаба қозондик. Ғалабани кўпчилик кутганди, ўзимиз ҳам. Бунгача ҳам ҳаракат қилдик, бироқ ўхшамади. Шу боис мағлубиятларга учрадик. Бу сафар эса ютдик, Худога шукр, мухлисларимиз олдида юзимиз ёруғ бўлди. Ютадиган пайтимиз келганди. Бу чўзилиб кетганди. Ишқибозларимизга доим бизни қўллаб-қувватлаб туришгани учун раҳмат.
- Жамоамиз учун учрашув ноқулай бошланди ва дастлабки дақиқаларда гол ўтказди. Нима учун бундай бошланди, деб ўйлайсиз?
- Ўйинга қўшилиб, мослашгунингизга қадар бироз тушунарсиз бўлади. Мослашганингиздан кейин бир хил темпда бўлади. Шу вақтгача бўлган вазиятда гол ўтказиб юбордик. Натижада бироз руҳий тушкунлик бўлди.
- Иккинчи таймни жамоа ажойиб бошлади ва бирин-кетин иккита гол урди. Танаффусдан сўнг мана шундай бурилишни қанчалик кутгандингиз?
- Биринчи таймдан кейин барча йигитлар билан ўзимизда эканлигини билиб, қандай вазиятда эканлигимизни тушуниб тургандик. Орқага йўл йўқ, йўқотадиган нарсамиз қолмаганди, фақат ютмоқ керак эди. Жамоани қийин вазиятдан олиб чиқиш лозим эди. Шунинг учун ҳаракат қилдик ва Худоим ҳам берди.
- Чиройли голингизга қандай таъриф берган бўлар эдингиз?
- Кузатган бўлсангиз, ундан олдинги учрашувларда ҳам дарвозаларга кўп зарба бердим. Дарвоза устунларига тўп тегаяпти. Бу сафар гол урдим. Ўзимга ҳам ёқди.
- Чиройли голларингиз орасида нечинчи ўринга қўйган бўлар эдингиз?
- Бунисига билмадим. Бундан ҳам чиройли голлар уришга ҳаракат қиламан.
- Олдимизда 27 май куни “Андижон”ни “Насаф”га қарши Суперкубок ўйини кутяпти. Бўлажак жиддий учрашув олдидан нима дея оласиз?
- Яна Суперкубокда ўйнаймизми-йўқми, Худо билади. Максимал даражада майдонда бор кучимизни сарфлаймиз. Орқага йўл йўқ. Майдонга чиқиб, жонимизни берамиз. Қолгани Худодан. Бизда яхши жамоа бор. Ҳамма нарса зўр. Тикланишни бажарамиз. Майдонга чиқамиз, ғалаба учун охиригача курашамиз. Бошқа вариант кўрмаяпман. Муҳими, бизда ишонч бор, Худо хоҳласа, ютамиз!
