Биринчи лига иштирокчиларини саралаш бошланди
Мусобақада иштирок этиш истагида бўлган жамоалар йилдан-йилга ошиб бормоқда. Хусусан, 2025 йилги мавсум Биринчи лигада 30 та жамоа тўп сурганди.
Лига сайтига “Биринчи лига регламенти” лойиҳаси жойлаштирилган бўлиб, унинг 8.2-бандидан Биринчи лигада қатнашиш истагида бўлган жамоалар учун мезонлар ўрин олган. Талабгор мазкур банд билан танишиб чиқиши ва шу асосда Лигага расмий мурожаат йўллаши сўралади. Ўз навбатида, Лига мурожаатларни ўрганиб чиққан ҳолда, иштирокчи жамоаларни Устави ва регламентлари асосида саралайди.
Биринчи лигада иштирок этиш истагида бўлган юридик шахс сифатида давлат рўйхатидан ўтган ёки унинг алоҳида таркибий бўлинмаси сифатида ташкил этилган футбол клуби қуйидаги ҳужжатларни info@pfl.uz электрон почта манзилига юбориши лозим:
• клуб раҳбар органи томонидан имзоланган қатнашчилар сафига қабул қилиш тўғрисидаги расмий ариза;
• футбол клубининг таъсис ҳужжатлари ва унинг фаолиятини тартибга солувчи ҳужжатлар нусхаси;
• клуб раҳбар органининг тайинлангани ёки сайлангани тўғрисидаги ҳужжат нусхаси;
• Мусобақа доирасидаги уй учрашувларини ўтказиш учун мулк ҳуқуқи ёки ижара ҳуқуқи асосида фойдаланилиши кўзда тутилган стадион тўғрисида маълумот;
• клуб раҳбар органи ва клубнинг контакт маълумотлари: телефон, расмий электрон почта манзили;
• клуб қай тарзда молиялаштирилиши тўғрисида асослантирилган ҳужжат;
• мавжуд бўлган тақдирда клуб қошида фаолият юритаётган футбол мактаби тўғрисида маълумот.
Юқорида кўрсатилган ҳужжатлар клубнинг расмий электрон почта манзили орқали юборилиши лозим. Ариза ва унга илова қилинган ҳужжатлар бўйича маълумотларда қандайдир камчиликлар аниқланган тақдирда ёки Лигада қўшимча саволлар юзага келган ҳолатда, Лига мутахассислари клуб билан боғланади. Клубда саволлар юзага келса, уни info@pfl.uz почта манзилига ёзиб юбориши ёки 94 6212141 (Лига юрисконсульти), 901898998 (Биринчи лига менежери) рақамлари билан боғланиши мумкин.
Лига иштирокчи жамоаларни саралашда регламент лойиҳасининг 8.2-бандига таянади. Талабгорнинг аризаси унинг Биринчи лига мусобақасида иштирок этишини билдирмайди, шунингдек, унинг қаноатлантирилиши кафолатланмайди. Ҳар қандай ҳолатда ҳам талабгор Лига томонидан қўйилган талабларни ўз вақтида ва пухта бажариши лозим.
Лига 31-январдан кейин келиб тушган аризаларни кўриб чиқмайди. Феврал ойининг дастлабки 10 кунлигида Лига келиб тушган аризаларни ўрганиб чиққан ҳолда, Биринчи лигада иштирок этиш эҳтимоли мавжуд бўлган клубларни саралаб олади. Кейинги босқичда мазкур клубларга Лига Устави ва ҳужжатлари асосида белгиланган кўринишда кириш ҳамда қатнашчилик бадалини тўлаш учун муддат белгиланади. Молиявий талабни ўз вақтида бажарган клуб Лига аъзолигига қабул қилинади.
