Артём Филипосян: «Келажакда ҳам ниятимиз мураббий сифатида иш олиб боришни истаймиз»
Ўз вақтида тажрибали футболчилардан ва айниқса, ҳимоя қўрғонида мустаҳкам ўйин кўрсатгани билан мухлисларнинг ёдида қолган Артём Филипосян бутсаларини михга илганидан кейин ўзини мураббийликка бағишлашга қарор қилди.
У ўтган йилдан бери Тошкентда болалар мураббийи сифатида ишлаб, ёшларни катта футбол сари тайёрлаб беришдек масъулиятли вазифада иш олиб бораяпти.
Энди мураббий Филипосян кўз олдимизда гавдаланишни бошламоқда. Ҳаётида янги саҳифа очилгач, у бу соҳага енг шимариб ишга киришди.
- Ўтган йилдан бери болалар мураббийи сифатида ишлаб келяпсиз? Улар билан ишлаш қандай экан?
- Ассалому алайкум. Бугунги кунда мен ва Александр Мерзляков билан бирга болалар футболида иш олиб бораяпмиз. Ёш болажонлар билан ишлаш ажойиб ўтяпти. Ўзимиз учун энг керакли жиҳати – мураббий сифатида аста-секинлик билан ўрганиб, ўсиб бормоқдамиз. Тўғри, қийинчилик тарафи ҳам бор. Лекин бу ҳар бир мураббийнинг ўсишига яхши ўрнак бўлиб боради. Мақсадимиз иложи борича кўпроқ бизнинг тўгарагимиздан яхши футболчиларни етказиб бериш. Яқин кунларда биз Чиғатой мактабига икки ўйинчимизни бердик ва бу яхши натижа, деб ўйлайман.
- Кейинчалик катта футболда ҳам мураббийлик қилиш ниятингиз борми ёки асосан ўзингизни болалар мураббийи ролида кўряпсизми?
- Бугунги кунда ҳозирча болалар билан иш олиб бораяпмиз. Кейинчалик албатта мақсадимиз бор. Ҳаётда ҳар доим олдинга интилиш керак. Насиб бўлса, келажакда ҳам ниятимиз мураббий сифатида иш олиб боришни истаймиз.
- Футболчи Филипосян ва мураббий Филипосян ўртасида қандай фарқ бор?
- Футболчилик фаолиятимда фақат машғулотларни ўйлардим ва ўйинларга ўзимни қандай тайёрлашимга кўп эътибор қаратардим. Мураббий ролида болаларни машғулотларни олиб бориши ҳамда яна кўп нарсаларга эътибор беришингизга тўғри келади.
- Футболчилик фаолиятингизда сиз учун энг унутиш мумкин бўлмаган лаҳзалар нималар бўлган?
- Футболчилик фаолиятимда мен учун энг унутилмас кун «Машъал» билан биринчи марта олий лигада ўйин ўтказганим.
- Ўзбекистон миллий жамоамизни мундиалдаги иштироклари борасида фикрингиз қандай?
- Ўзбекистон миллий жамоамиз биринчи марта жаҳон чемпионатида иштирок этди. Биз кучли гуруҳга тушдик. Бироқ футболчилар қўлидан келганича ҳаракат қилишди. Португалия, Колумбия ва Конгонинг кўп ўйинчилари Европа чемпионатларида тўп тепишади.
- Сиз билан бирга ишлаган мураббийларнинг қайси биридан кўп нарса ўргандингиз?
- Фаолиятимда кўп мураббийлар билан ишлаш насиб қилди. Шунинг учун ҳамма мураббийларга раҳматимни айтаман ва ҳар биридан ўзимга керакли нарсаларни олдим, деб ўйлайман.
- Болалар билан ишлашда сизга энг завқли томони нимада бўляпти?
- Болалар билан ишлашда энг муҳими, уларни тўғри йўналишда ўргатиш ва иш олиб бориши ёқимли бўляпти. Шу нарсадан кўпроқ хурсанд бўляпман.
- Сиз учун ким кумир бўлган?
- Олдинлари кўп яхши футболчиларнинг ўйинини кўрганман. Ўзим «Барселона»га мухлисиман. Ҳимоячи сифатида Карлес Пуйол мен учун энг зўри бўлган.
- Мундиалда ким чемпион бўлади, деб ўйлайсиз?
- Португалия ва Францияга мухлислик қилаётгандим. Аммо Португалия мусобақа билан хайрлашди. Франция жаҳон чемпиони бўлса хурсанд бўламан.