Антонио Конте “Манчестер Юнайтед”ни бошқаришга тайёр
Италиялик мураббий Антонио Конте “Манчестер Юнайтед” бош мураббийлигига асосий номзодлардан бирига айланиши мумкин. Хабарларга кўра, мутахассис Манчестер клубида ишлашга қизиқиш билдирмоқда. Бу ҳақда talkSPORT нашри хабар бермоқда.
Манбага кўра, Контенинг вакиллари “Манчестер Юнайтед” раҳбариятига мураббий жамоани бошқариш имкониятини кўриб чиқишга тайёрлигини етказган. Клубнинг муваффақиятсиз натижалари амалдаги бош мураббий Майкл Кэррикнинг келажаги юзасидан саволларни кучайтирган.
“Манчестер Юнайтед” ҳозирда бошқа мураббийларнинг номзодларини ҳам ўрганмоқда. Улар орасида Юлиан Нагельсманн ва Фабиан Хюрцелер каби мутахассислар ҳам тилга олинган. Бироқ клуб раҳбарияти мураббийлар алмашинуви ҳақида ҳозирча расмий қарор қабул қилмаган.
Маълумот учун, Конте аввалроқ “Челси” ва “Тоттенҳем” клубларида фаолият юритган. Италиялик мутахассис Англия Премьер-лигасида ҳам чемпионликни қўлга киритган. Унинг “Манчестер Юнайтед”га келиши ҳозирча эҳтимолий вариант сифатида муҳокама қилинмоқда.
