Андижон Тожикистон клуби билан дуранг ўйнади
Максим Шацких жамоаси ФИФА кунларидан фойдаланиб, “Хўжанд”га қарши белгиланган ўртоқлик ўйинини ўтказди. Бу албатта бизнинг “Бургутлар” учун жуда керакли ўйин эди. Чунки, бўлажак расмий ўйин олдидан мураббийлар штаби барча футболчиларнинг функциянал ҳолатини ва тактик услубларга мослашиш жараёнида қўлланилаётган схемаларни ўйин орқали кўриб олишлари айни муддао эди. Бундан ташқари, мазкур йиғинда ёшлар жамоамиздан бир қатор ёшлар ҳам жалб қилинган бўлиб, уларни ҳам синовдан ўтказиш тақозо этиларди.
Шу сабабли “Хўжанд”га қарши баҳснинг дастлабки дақиқаларидан мураббийлар штаби асосан ёшларга имконият тақдим этди. Учрашув эса 30 дақиқадан 4 тайм давомида ўтказилди.
Дастлабки икки таймдан сўнг асосий таркиб ўйинчилари майдонга тушишди. Ўйин давомида иккита гол кўрдик. Аввалига Абдураҳмон Комиловга нисбатан ишлатилган қўполликдан сўнг белгиланган пенальтини Дамир Темиров голга айлантирган бўлса, учрашув охирларида рақиб жамоа ҳисобни тенглаштирди.
Албатта, баҳс давомида футболчиларимиз “Хўжанд” дарвозаси олдида бир қатор голли имкониятларни ҳосил қилдилар. Бироқ якунда ҳужумларни гол билан тугатишда омад етмади. Муҳими, жамоада ўзига бўлган ишонч юқори.
“Андижон” Суперлигасининг 12-турини 13 июн куни Самарқандда “Бухоро”га қарши ўтказади. Футболчиларимиз бир кунлик хордиқдан кейин эртадан яна машғулотларга киришишади ҳамда “Бухоро”га қарши кечадиган учрашув учун тайёргарликни давом эттирадилар.
“Хўжанд” ва “Андижон” 1:1
