Абдуқодир Хусановнинг ёшликдаги оғир касаллиги ошкор қилинди
Ўзбекистон футболининг афсонаси, ҳозирда мураббий ва функционер сифатида фаолият юритиб келаётган Азамат Абдураимов «Манчестер Сити»да тўп сураётган Абдуқодир Хусанов ҳақида самимий хотиралари билан ўртоқлашди. У Хусанов билан 14 ёшидан ишлаган ва унинг футболдаги илк қадамларига шоҳид бўлган.
Абдураимовнинг сўзларига кўра, ёш Хусанов 15 ёшида тез ўсиб, Шляттер касаллигига дучор бўлган — бу касаллик ўсмир спортчиларда тез-тез учрайди ва тиззалардаги оғриқ билан кечади. Бу сабабли у бир неча ой терма жамоадан четда қолган.
— Кодир жамоамда илк кунлардан бор эди. У ярим ҳимоячи сифатида яхши узатмалар бериши билан ажралиб турарди. Аммо бўйи паст эди. Кейин ўса бошлади ва тиззадаги оғриқлар бошланди. Шундан сўнг отаси Хикмат ака билан маслаҳатлашиб, бир неча ой терма жамоага чақирмасликка қарор қилдик. Кейинроқ тўлиқ тикланиб, 2019 йил Минскдаги мусобақа олдидан уни қайтардим, капитан қилиб тайинладим ва ҳимояга ўтказдим. Шундан кейин жуда яхши натижалар кўрсатди, — деди Абдураимов Fergana.news’га берган интервьюсида.
Эслатиб ўтамиз, Абдуқодир Хусанов 2024 йил қишида «Ланс» жамоасидан Англиянинг «Манчестер Сити» клубига 50 миллион евро эвазига ўтган эди. У ҳозирда Ўзбекистон футболининг энг ёрқин ва истиқболли юлдузларидан бири сифатида эътироф этилмоқда.
