Аббосбек Файзуллаевнинг тақдирини янги мураббий ҳал қилади
Ўзбекистон терма жамоаси ярим ҳимоячиси Аббосбек Файзуллаевнинг Москва ЦСКА клубидаги келажаги жамоанинг янги бош мураббийи — швейцариялик мутахассис Фабио Челестини қарорига боғлиқ бўлади. Янги мураббийнинг тайинланиши клуб ва футболчи олдида ҳамкорликни давом эттириш ёки тугатиш масаласини кун тартибига чиқарди. Бу эса Осиё минтақасидаги энг иқтидорли футболчилардан бири саналган Файзуллаевнинг фаолиятига жиддий таъсир қилиши мумкин.
Ҳозирги вазиятда ривожланиш икки йўналиш бўйича кечиши мумкин. Биринчи сценарийга кўра, Челестини Аббосбекни ҳужумкор ўйин марказига айлантириш ниятида бўлиб, унинг дриблинг ва ижодкорлик қобилиятидан тўлиқ фойдаланади. Иккинчи ҳолат эса унча ёқимли эмас — агар мураббий уни асосий таркиб аъзоси сифатида кўрмаса, клуб футболчини бошқа жамоага ўтказиш бўйича музокараларни бошлаши мумкин.
Эслатиб ўтамиз, Аббосбек Файзуллаев 2023 йили Осиё футбол конфедерацияси (АФК) томонидан йилнинг энг яхши ёш футболчиси деб эътироф этилган эди.
